Webby Award tunniunneqalerpat isiginnaaqataagit

Unnummut internetti aqqutigalugu Kalaallit Nunaata takornariartitsinermut nittartagaa greenland.com New Yorkimi nersorniarneqalerpat toqqaannartumik isiginnaaqataasinnaavutit

Nikolaj Coster-Waldau nulianilu Nukâka Coster-Waldau 2007'imi assilisaq. Assi: Polfoto

Unnugu nal. 19.30 nittartakkanut nersornaasiuttagaq Webby Award greenland.com'imut New Yorkimi tunniunneqalerpat, Visit Greenland sinnerlugu isiginnaartitsisartup Nicolaj Coster Waldau aamma Visit Greenlandip aallartitaa Ella Grødem nersornaammik tigusilerpata isiginnaaqataasinnaavutit.

Soorlu siornatigut allaaserereeripput Nikolaj Coster-Waldau neriorsuinikuuvoq qujaniarluni oqalugialeruni kalaallisut oqaaseqalaarniarluni.

- Malittarisassat imaapput oqaatsit tallimat kisimik oqaatigineqaqqusaasut, Nikolaj Coster-Waldau kalaallisut oqaatsit pingasut oqaatigissavai, taava Ella Grødemip oqaatsit marluk nutserinermut atussallugit, Malik Milfeldt, Visit Greenlandimit Sermitsiaq.AG'mut oqarpoq.

Greenland.com'ip nersornaasissutigissavaa "People's Voice Award", nunarsuarmi tamarmi internettimik atuisut taasinerannit pissarsiarineqatoq, New Yorkip nittartagaa nycgo.com naliliisartut ajugaasussatut naliligarigaat.

Webby Award assersuunneqarpoq internettimi nittartakkat Oscariattut.

Nersornaasiineq New Yorkimi nalunaaqutaq malillugu 17.30 aallartissaaq. Nersornaasiineq uannga malinnaaffigineqarsinnaavoq: webbyawards.com.

Powered by Labrador CMS