Qeqertarsuatsiaat eqqaanni nanoq

Mannissarniat Qeqertarsuatsiaat eqqaanni arfininngornermi ualikkut nannumit tupatsinneqartut

Ukioq manna nannuttassat nungoreerput taamaammat nanoq qimaasinniarneqarpoq. Qeqertarsuatsiaanut ungasinngitsumi arfininngornermi nanoq takuneqarpoq. Assi toqqorsivimmit: Pauline Abelsen

Qeqertarsuatsiaanit 10 kilometeri avannamut qeqertami mannissarniat tupatsinneqarujussuarput nannumit nunamut qaqisimasumit isiginnaarneqarlutik paasigamikku. Tamanna arfininngornermi ualikkut pisoq Nuummi politiit Sermitsiaq.AG'mut ilisimatitsipput.

- Nanoq alapernaatsorujussuaq qanillattorsimavoq. Mannissarnialli umiatsiminnut ammut arpapallassimapput uagutsinnut qanoq iliornissaminnik paasiniaallutik, Nuummi politiini pigaartoq Knud Frederiksen oqaluttuarpoq.

Kingunitsiaa kommunefogedi kalerrinneqarpoq taannalu qeqertamut aallapallalluni, Knud Frederiksen oqarpoq.

- Nannuttassat tamakkereerput taamaattumik suut tamaasa atorlugit nanoq qimaasinniarneqarluni, kisianni aalisarnermut, piniarnermut nunalerinermullu naalakkersuisoq saaffigereerparput, tassa maannakkut suut tamaasa atorlugit qimaatinniarneqarallarpoq.

Powered by Labrador CMS