Liza Copenhagen Marathon peqataaffigissavaa

Sapaammi Copenhagen Marathon ingerlanneqassaaq - Liza Itzchaky pitsaanerpaat akornanni inississangatinneqartup neriuutigaa apuukkuni 2.55 atorsimassallugu

Liza Tuperna Itzchaky 2006'imi perngaamik maraton'eqataaqqaarpoq - aqagu Copenhagen Marathon ingerlanneqartussami pitsaanerit akornanni inissinnissaa ilimagineqarpoq. Assi Nuummi arpalluni peqataanermini taamani Heinrich kinguliaraa. Assi: Leiff Josefsen

- Pissanganarsiartuaaq. Taamaattariaqarpoq tassa unammisartuunerup ilaa, taamaattumik immikkut ippoq, arpannernit allanit allaanerusoq, unamminernit naatsunit misiliilluni arpannernit pisussap tungaanut ingerlaarfigisimasanit allaanerusoq.

Taama oqaluttuarpoq Liza Tuperna Itzchaky, timigissaatigiinnarlugu arpattartumiit ilungersuullugu arpattartunngorsimasoq. Aqagu sapaammi Copenhagen Marathon peqataaffigissavaa naatsorsuutigineqarluni Danmarkimi arpattartut pitsaanerpaat akornannut inissinnissaa aamma 2.55 atorlugu arpassasoq. Nunatsinni atuagassiat saqqummersartut nuimanersaanni Arnanut allaaserisaanikuuvoq aamma 2006 perngaamik marathonimut peqataaqqaarpoq. Taamani assut pakatsisimavoq.

Taamanili pisut oqaluttuaannanngorput. Pitsanngorujussuarnikuuvoq pitsaanerpaat akornannut inissinnissaata naatsorsuutigineqarnera pissutigalugu, arnat allat angusarissaartussatut naatsorsuutigisat akornannit aallassaaq aammalu immikkut kissasserfissaqartinneqassalluni.

Piffissaq atugassaa 2.55'iusoq naatsorsuutigineqarpoq, Liza Tuperna Itzchaky oqaluttuarpoq:

- 3 tiimit ataallugit arpassinnaannginnguatsiarpunga naak marathonip affaani arpattarnera 1½ minutsinik pitsanngortissimagaluarlugu, taamaattumik pitsaanerpaat akornanni angusaqarnissama naatsorsuutaanera pissusissamisoorunanngikkaluarpoq. Taanna eqqarsaatiginaveersaarpara imaanngimmat taanna anguniassagiga kisiannili sungiusaasunnit kaammattuutitut paaserusunnerullugu. Neriuppunga 3.01-3.02 angusinnaassallugit, taamaaliussaguma nunatsinni rekordiliissaanga aamma inuttut.

Iphonennut apps'imik akeqanngitsumik aallersinnaavutit Copenhagen Marathon ujarlugu. Tassani peqataasup nalunngisavit aqqa allassavat arpanerullu nalaani qanoq ingerlanersoq malinnaaffigalugu.


Powered by Labrador CMS