Pisortat aningaasarsiamik qaffaatissaat siumoorutigigaat
Inatsimmik malitassaqaratik peqqinnissaqarfimmi pisortat arlaleriarlutik aningaasarsiassamik qaffaatissaat pissarsiarisimavaat. - Sulisunut ataasiakkaanut tunngassuteqartoq, Agathe Fontain oqarpoq
Sulisunut ataasiakkaanut tunngassuteqarpoq tamanna kikkut tamat tusaatillugit oqaluuserisassaanngilaq pingartumik tusagassiiviit aqqutigalugit.
Peqqissutsimut naalakkersuisoq Agathe Fontain taama akissuteqarpoq Aleqa Hammondip Siumumeersup apeqqutaa: - Ilumoorpa, peqqinnissaqarfiup arlaleriarluni atorfilittami arlallit aningaasarsiassaannik suli isumaqatigiinniassutigineqanngitsunik tunniussisarsimanera.
Agathe Fontainip ilumoornerarpaa suli inatsisimmik malitassaqanngikkaluarni aningaasarsisitsisoqartarsimasoq.
- Suliap massuma inunnut ataasiakkaanut tunnganera tusagassiiviit, sulianiaqatigiiffiit peqqinnissaqarfimmilu sulisut allat ataqqiniarsimanngilaat. Suliat inunnut ataasiakkaanut tunngasut qanoq ingerlanneqarnissaat erseqqissunik malittarisassaqarput illuatungeriit atugarisassaat qulakkeerniarlugit, Agathe Fontain oqarpoq, taassuma nalunaarutigiumanngilaa Inatsisartunut allanulluunniit suliap qanoq ingerlanneqarnissaa.
Agathe Fontainip aamma oqaatigaa sulisunut ataasiakkaanut tunngasut politikkikkut qanoq iliuuseqarfigilersaarnagit:
- Aningaasat tunniunneqarsimasut pillugit illup iluani illullu avataani misissuisoqareerpoq. Kukkunersiuisartut Deloitte'p nalunaarutaa pigaarput, Naalakkersuisut pilersaarutiginngilaat misissuisitsinernik allanik ingerlatsinissaq, Agathe Fontain oqarpoq.