Coster-Waldau internettikkut Oscarinnattaamik aallissasoq

Isiginnaagassamik nangeqattartumi inuttaasoq Nicolaj Coster-Waldau piffissami matumani USA nunarsuullu ilarujussuani "Game of Thrones" aqqutigalugu maluginiarneqartoq nittartagaq Vidt Greenlandimit tunuliaqutaaffigineqartoq greenland.com pillugu Kalaallt Nunaata internettikkut Oscarinnattaa siulleq ataasinngorpat New Yorkimi tigussavaa.

Taamaaliussaaq suliffeqarfimmi nittartakkamut akisussaasoq Ella Grødem peqatigalugu.

Qallunaaq isiginnaartitsisartoq tusaamasaq isiginnaartitsisartup Nukâka Coster-Waldauip aapparisaa, takorluukkamik nangeqattaartuliaq ukiunut akullernut tunngatitaq "Game of Thrones" USA-mit nuannarineqarluartoq piffissamilu matumani TV3 Viasatimi aamma takutinneqartoq aqqutigalugu tusaamasaallualersimavoq.

Kalaallit Nunaata takornariaqarnermut nittartagaa naluneqanngitsutut "takornariaqarnermut" tunngasuni "The People's Voice"-mik, internettimik atuisartut nersornaasiuttagaannik, pinnappoq, New Yorkip takornariaqarnermut nittartagaa naliliisartut nersornaasiuttagaannik pinnattoq.

- "Innuttaasut nersornaasiuttagaannik" pinnannerput nuannaarutigaarput. Naliliisartut nersornaasiuttagaat aamma perusussimagaluarparput, nittartagarli pingaartumik atuisunut suliarisimavarput, taakkunanngalu nersualaarneqarneq immikkut pingaaruteqarpoq. Sinnerlutalu Nicolaj peqataajumammat ajunngilluinnarpoq, tamannami nittarsaassinermut pingaarutilerujussuanngorsinnaavoq, Ella Grødem oqarpoq.

Læs også "Ove Karl: Jeg er imponeret"

Læs også "Grønland løb med internet-Oscar"

Nicolaj Coster-Waldau Kalaallit Nunaata New Yorkimi tapersersornissaanut aamma qilanaarpoq:

- Kalaallit Nunaannut tassanngaanneersunullu tamanut asannittorujussuuvunga, isumaqarpungalu unammisitsinermi akuerisaalluartumi tassani Kalaallit Nunaata takornariaqarnikkut avammut kiinaata taama malunniuteqartiginera pikkunarluinnartuusoq, Nicolaj Coster-Waldau oqarpoq, ilaquttamilu nunarsuarmi qeqertat annersaannut attuumassuteqarnerannik Amerikamiunut isiginnaartartunut erseqqissaassuteqarnissani qilanaarinerarlugu.

Qallunaap filimiliornermi tv-liornermilu tusaamasap Kalaallit Nunaat sinnerlugu pisussamut ataasinngorpat tusagassiorfinnit annertuumik sammineqartussatut ilimagineqartumut, webbyawards.com-imilu toqqaannartumik aallakaatinneqartussamut sassarumanera Visit Greenlandimi pisortamit Anders Stenbakkenimit aamma nuannaarutigineqarpoq.

Kalaallisut oqaaseqassamaartoq
- Sinnerluta Nicolaj sassarumammat taamalu Kalaallit Nunaat greenland.comilu annerusumik eqqumaffigineqartikkusummagit nuanaarutigisorujussuuarput, aamma oqaatsit tallimat atorlugit qujassuteqarluni oqaaseqarnermi taassuma suleqatittalu qanoq oqarumaarnissaannut tusarnaarnissamut qilanaarpunga. Coster-Waldauip kalaallisut oqaaseqalaarnissaanik eqqarsaateqarput, Anders Stenbakken oqarpoq, taamaattorli annerusumik oqaaseqarusunnani.

Unnugu nal. 19 aamma 20 akornanni Nicolaj Coster-Waldau aamma Ella Grødem DR1'imi Aftenshowimut qaaqqusaapput pisussaq nersornaallu greenlan.comimit pineqartussaq pillugit tv-iikkut toqqaannartumik oqaluttuariartoqqullugit.