Oqaluttuaq: Misigisaq eqqumiitsoq

Sermitsiaq.AG qiiaammisarnartumik AG-mik atuartartut poorskimi saqqummersitamut allaaserisaannik matumani ilanngusseqqippoq

Aliortukkat, pisimasut nalinginnaanngitsut, nassuiaruminaatsut ufollu.

Qiiaammisarnartuutitsinnut AG-mik atuartartut AG-p poorskimi aviisianut allataannut atatillugu oqaluttuanik nuannersunik, eqqumiitsunik tupinnartunillu piffissami matuma ulikkaarpoq.

Oqaluttuaq ajugaasoq ”igalaami tarraqPavia Møllerimit allanneqartoq nittartakkami maanga ilanngutereerparput.

Læs også "- Den værste oplevelse i mit liv"

Maanna Amalie Rosingip, Ilulissat, oqaluttuaa "Misigisaq eqqumiitsoq" ilanngupparput.

Atuarluarisi!

”Unnukkut ilaquttakka innareersut eqqumavunga, atuarujoorlunga. Tusaasaqalerpunga meeraaraq qiarpaluttoq. Nikuikkama igalaakkut isaannivunga isumaqaavikkama silatitsinni qiarpaluttoq, aappaatigullu unnummat silamiittoqarnissaa eqqumiigalugu. Silami ersittoqanngilaq, kisiannili suli tusaasara tusaavara, meeraaraq qiarpaluppoq.

Paniga ataasileeqqammisoq sinittoq alakkaralarpara, kisianni aamma taanna qianngilaq. Paasineq ajulerpara sumi qiarpalunnersoq, qianeranilu ilungersornera tusaasinnaavara. Qiagaluttuinnarpoq, qiangaarami allaat anernissaaruttaarpalulerpoq. Nerriviup nerisarfiup sanianut nikuillunga tusaaniarsarilerpara sumiiffissiniarsaralugu. Tassanngaannarli paasilerpara qiarpaluk nerriviup qaavaninngaanneersuusoq. Assut tupallunga isigilerpara - unnulersoruna tiitorusulerlunga tiiliortunga. Tekande isigilerpara paasillugulu taannaasoq nipiliortoq, kisianni tekande kissartumik imaqartilluni nipiliortarneratut nipiliunngilaq, kisiannili meeraaraq qiarpaluttoq nipiliorutigalugu.

Immaqa minutsit marluk saniani nikorfavunga paasiniarsaralugu sooq taamatut nipiliornersoq, tusaanerluinnarnerlugu. Kisianni naamik tusaanerlunngilanga, tekandip nipiliornera tassaavoq meeraaraq qiasoq. Isiginerani ima qiarpalutsigilerpoq allaat anernissaaruttaarluni, ilungersorpalungaarpoq soorlu tigoqqusoq. Tassani nikorfaninni tassanngaannaavik ersinerujussuup tikippaanga, qanoruna misigisaqalersunga? Susoqalersoruna? Tassalu nippakkaluttuinnalerluni. Eqqarsarluanngivillunga tekande tigoriarlugu matua iluarsivara ammaamillugu, tuaviinnarlu qatseripallariarlunga sinittarfiliarlunga innariartorlunga.

Uiga sinittoq sinittarfimmut iseriarama itertoq apersulerpara tusaasaqarsimasoralugu, naggataatigummi nipitoorujussuarmik meeraaraq qiarpaluttoq tusaagakku. Naamik tusaasaqarsimanani oqarpoq. Eqqartulerparput soormita taamatut misigisaqartunga, isumaqatigiillutalu maluginiarumaarlugu kingorna qanoq pisoqassanersoq. Ullualunnguit qaangiuttut kalerritsippugut aniga siullermeerluni meerartaalersoq. Eqqarsaatigisarpara immaqa arlaatigut ilimasaarneqartunga taamatut pisoqalersoq?

Tassalu misigisimasara eqqumiitsoq".

AG-p poorskimi aviisia qiiaammisaarnartut tamaasa ilanngullugit uani pisiarisinnaavat:

Powered by Labrador CMS