Kujallermi mingutsitsisinnaaneq annikillisarneqartoq
Kommune Kujalleq ilisimatitsivoq Qaqortumi nappartarsuit oqallisaaqisut maannalu kommunimit piiarneqartut, aqqusinerni asfalterinermi atorneqartartumik uuliamik imaqartut
Qaqortumi nappartarsuit maanna oqallisaaleqisut aqqusinerni asfalterinermi sinnikunik imaqartut, kommunip "ukiorpassuanngortuni" toqqortaatigisimavai, kommuni Qaqortumi asfaltiliorfittaannginnerata siornali katersat.
Taama nassuiaateqarpoq Kommune Kujallermi teknikkeqarnermik pisortaq.
Taassuma allaaserisarput ”Kujalleq uulia nussorpaa” oqaaseqarfigerusuppaa uagut allakkatta nappartarsuit uuliamik akoqarnerarlugit.
- Seerisoq tassaavoq aqqusinerni asfaltilersuinermi atorneqartartoq, 150-160 gradinik kissatsikkaanni ima qinissuseqalersarpoq asfaltimik nalinginnaasumik akullugu aqqusiniliornermi atorneqartarluni. Taamaattoq imermit arrortinneqarsinnaanngilaq, taamaattumik seerisimasoq taanna mingutsitsisinnaanersoq nalilersorneqassaaq Kalaallit Nunaanni aqqusinerni asfaltikkanit mingutsitsisinnaanerisa nalilersorneqarnerannut assingusumik. Atortussiaq taanna ukiut tamaasa kommunip aqquserngini iluarsaasitilluta asfaltilersuisilluta atortarparput, Jan Kjær nassuiaavoq.
Avatangiisinik illersuiniaqatigiit Avataq nappartarsuit manngertornisimallutik uuliamik seerisut isornartorsiorpaat.
Kommuni sulivoq
- Seerisimasoq katersorlugu aallartereerparput ajornartorsiutaananilu, pissutigalugu uuliakoorut asfaltitulli nalinginnaasutut kinissuseqarami, Jan Kjær oqarpoq.
- Qanoruup ilanngutassiaani assit nunaminertamit tassannga arlaleriarlutik takutinneqarput, takuneqarsinnaalluni sulilluni atugassiaq qernertoq ammukajaakkut kuussimasoq. Taanna kuunneq nappartarsuit palitsinit marlunnit uppissimasunit aallaaveqarpoq. Kujataani piffissami kingullermi upernarnerani suut tamarmik kuugaarnerannut ilanngunneqartariaqarpoq. Kuuttoq tyggegummisulli issussuseqarpoq. Maajip qulinganili kommunit sannaviisiviani sulisut sumiiffimmi tassani mingutserineq tamakkerlugu piingajakkaluarpaa.
- Kommunip sannaviisiviani sulisut nappartarsuit tamaasa misissorlugit naammassilerpoq nappartarsuillu putullit isumagereerlugit, Jan Kjær oqarpoq.
- Ilissi sulerivisi aamma susoqarpa?
- Nappartarsuit putusimanngitsut membranimut iliorarneqarput, siunissami mingutsitsisoqassagaluarpat poortorsimalerlutik. Tamatuma saniatigut nappartarsuarnik nutaanik pisiortorpugut, taamaaliorluta asfalterinermi atortut ilaat qaqqaqqalaarutaasut allanut nussorniassagatsigit.
- Aamma nalugineqaqquneqarpoq, Kommune Kujallermi asfaltiliorfik nappartarsuillu asfaltiliornermi atortussanik imallit, qanga illoqarfik Julianehåbimik ateqarallarmat eqqaavikuata nunataanni inissisimammata. Tamanna isumaqanngilaq unitsiinnassagigut sumiginnarlugillu. Siunissami ullormut "nakkutilliinermi nalunaarut" immersorneqartassaaq, mingutsitsisoqannginnissaa qulakkeerniarlugu taamalu mingutsitsisoqassagaluarpat piiaanissaq upalungaarsimaffiginiarlugu, Jan Kjær nassuiaavoq.