Tunumi sulisilluni ajoqusernerit soqutigineqanngillat

Sulisilluni Ajoqusernerit pillugit Sullissivik Tunumi sulisilluni ajoqusernerit pillugit nalunaarutinik ikippallaanik pisarpoq.

Innuttaasut amerlassusaat inuussutissarsiornerup katitigaaneranut naleqqiullugu nalunaarutigineqartartut ikippallaartut misissueqqissaarnerup takutippaa.

2011-mi nalunaarutigineqartut 650-it missaasa Sullissivimmut nassiunneqartut 1 procentii Tunuminngaanneersuupput.

Taamaattumik Sulisilluni Ajoqusernerit pillugit Sullissivimmiit maajimi juunimilu sulisilluni ajoqusernerit pillugit Tunumut annertuumik paasisitsiniaajartorniarput. Paasisitsiniaanermi siunertarineqarpoq Tunumi sulisut sulisitsisullu sulisilluni ajoqusernerit pillugit sullissinerup ataqatigiinnermik aaqqissuussaaneranut naleqqiullugu suut periarfissarineraat suullu pisussaaffigineraat oqaluttuarissallugu.

Taasiiffigitinnissaq pinngitsoorneqarsinnaavoq
- Sulisilluni ajoqusernernut ilisimasaqarnerulernissaq anguniarneqarpoq, ajoqusersimasullu amerlanerit taarsiivigineqarnissamut pisinnaatitaaffiisa ilisimaneqarnerulernissaat qulakkeerniarneqarluni, Kristina Nordby-Rachlitz sullissiviup pisortaa oqarpoq.

Sulinermi ajoqusersimagaanni nappaateqalersimagaanniluunniit ajoqusernerup Sulisilluni Ajoqusernerit pillugit Sullissivimmut nalunaarutigineqarnissaa pingaaruteqarpoq. Nalunaarummik pinngikkuttta suliaq ingerlassinnaanngilarput, taamaalillunilu sulisup taarsiivigitissinnaanerigaluani pinngitsoortissinnaallugu.

Suliniuteqarnermut tunngatillugu Sulisilluni Ajoqusernerit pillugit Sullissiviup plakatit marluk sulisunut sulisitsisunullu tunngasut sanatippai.