Jess G: Siumut aquutaaruttoq?

Siumut nalorninarluinnartumik oqariartuuteqarpoq. Maniitsup eqqaani Alcoap pilersaarutaanut tunngatillugu ajorinngikkaat nunani allaninngaanneersut annikinerusumik aningaasarsiaqartinneqaraluarpata? SIK tupigusuppoq.

Jess G. Berthelsen isumaqarpoq, Siumut nalorninarluinnartumik oqariartuuteqarpoq. Assi: Leiff Josefsen

SIK'p siulittaasua Jess G. Berthelsenip Siumut paasisinnaajunnaarpaa Alcoap pilersaarutaanut isummersuutai pillugit. Ippassaani inuussutissarsiornikkut ingerlatassat angisuut pilersiniarneqarneranni sinaakkutissatut piumasaqaatissat pillugit nassuiaat pillugu oqallinnermi, Siumut IA-llu ersarissumik nalunaarutaat SIK-mit assut nuannaarutigisimavarput. Taakkua Partiit angisuut marluk ersarilluinnartumik oqariartuutigaat, inuutissarsiornikkut ingerlatassat angisuut pineqarpata, taava nunami maani aningaasarsiat ataqqineqarlutik atuutinneqassasut.

- Maannakkulli Siumut nalorninarluinnartumik oqariartuuteqarpoq. Tassa imatut isikkoqalermat Alcoa-mut tunngatillugu immikkuullarissumik isummertoqassasoq. Imaannerpa Siumut maannakkut isummertoq Alcoa-mut tungatilugu ajorinngikkaat nunani allaninngaanneersut annikinerusumik aningaasarsiaqartinneqaraluarpata? Alcoa pilersineqaruni naammattoq. Maannakut tusagassiutitigut nalunaarumminni ilaatigut oqariartuutigimmassasuk, Naalakkersuisut isummernissamut tunngavissamik, Inatsisartunut saqqummiussinissaanut ilaatigut aningaasarsianut tunngasut isummerfigiumaarlugit, sulisartut siulittaasuat tusagassiivinnut allappoq.

Ippassaani oqallisigineqartoq tassaavoq, Kalaallit Nunaanni inuussutissarsiornikkut ingerlatassat angisuut, pilersinniarneqarnerani sinaakkutissatut piumasaqaatissat, tassanilu aammattaaq Alcoa ilaavoq.Taamaattumik SIK-p tupigusuutinngitsuunngilaa, maannakkut Partii Siumut Alcoa-mut tunngatillugu immikkuullarissumik isummersornialersorinarmat..

- Tusagassiuutinummi nalunaarummini Alcoamut atatillugu allappoq nunanit allanit suliartortitassat nunami maani najugalinnit atugarissaannginnerunissaat (socialdumping) isummerfigerpasinnagu, Jess G. Berthelsen, issuaalluni:

- Siumut allappoq Alcoap pilersinneqarnissaa Siumumut pingaaruteqartoq, naak tusaamagipput Alcoap piumasarilluinnaraa, sanaartornermini nunanik allamiunik akissarsiakitsunik sulisoqarnissani.

- Tamanna Siumup akuersaalersimanerpaa? Taamaanngippat Siumut maannangaaq erseqqissumik nalunaareertariaqarpoq suliffeqarfinnik angisuunik sunilluunniit, nunatsinni pilersitsisoqassappat sinaakkutissatut piumasaqaatit saneqqunneqarsinnaanngitsut ilagigaat nunami maani sulisoqarnikkut isumaqatigiissutit malillugit ingerlatsisoqassasoq, Jess G. Berthelsen naliliivoq.

- Qanittukkut Island-imi Nunani avannarlerni Socialdemokraatit ataatsimoorussamik oqaaseqaateqarniarlutik oqariartuuteqarmata Siumut siulittasuat oqarasuaatikkut attaaveqarfigaara Socialdumping qanoq isummerfineraat paasiniaaffigalugu. Taamanikkullu ersarilluinnartumik akissuteqarpoq, Partiip Siumup socialdumping akuersaarsinnaanngilluinnaraa. Tamannalu ilaatigut aallaavigalugu Nunani avannarlerni Socialdemokratisk gruppi tusagassiutitigut nalunaaruteqarpoq Socialdumping mianersuutigeqqullugu, Jess G. Berthelsen allappoq.

Powered by Labrador CMS