Doris: Sungiusimavara
Nittartakkatsinni paasiniaanitsinni takusinnaavarput taasisut tallimararterutaasa politikkerimik Doris Jakobsenimik KNR'ip quiasaarusiaa ingasappallaartoq
Doris Jakobsen, Siumut, KNR'ip quiasaarusiaa Labrador Kangian oqaaseqarfigiumanngikkaluarpaa, pingaartumik aallakaatitap ilaannit tigulaagaq Sermitsiaq.AG'ip arfininngornermi nittartakkaminut ivertitaa pillugu.
Aallakaatitap ilaani kalaallisut oqaasertalimmi takuneqarsinnaavoq Doris Jakobsen taassumalu assammioqarfia - Eqaluk Høeghimit Doris Jakobseniusaarpoq aamma Martin Brandt Hansen Doris Jakobsenip assammioqarfianut inuttaasuusaarluni.
- Ukiuni qulini politikkimik ingerlatsivunga sammineqartarnera sungiusimavara. KNR'ip quiasaarusiaata attorsinnaanngilaanga nuanniilliortillungaluunniit soqutiginngilara. Uannut nuannaajallannarpoq taasisut 20 procentii isumaqarmata KNR ingasappallaartoq. Uanga suliffinni nuannersut isiginiagassaapput tamakku politikkikkut suliniarninnik nukissarsiffigisarpakka. Suut tamaasa piareersimaffigaakka, Doris Jakobsen Sermitsiaq.AG'mut oqarpoq.
Uagut taasisitsinitsinni taasisut 80 procentiisa missaat isumaqarput Labrador Kangian Doris pillugu sammisaq, sisamanngornikkut unnukkut KNR TV'ikkut aallakaatinneqartoq pissusissamisoortoq. 20 procentit isumaqarput KNR ingasaassisoq.
KNR ilisimatitsivoq aallakaatitaq aallakaateqqinneqassasoq pilersaarutaasoq naapertorlugu sisamanngornermi aallakaatitami kukkunerit ilanngunnagit, tallimanngornermi KNR'ip inuusuttunut aaqqissuisoqarfia Doris Jakobsenimut utoqqatsissuteqarput.