Parnaarussaq pillugu suliaq Strasbourgiliassaaq
Nutartigaq 12.37 Eqqartuussissuserisup angummut kalaallimut 42'nik ukiulimmut Herstedvesterimi parnaarussaasumut suliaq Højesteretimut ingerlateqqippaa. Højesteretip suliaq ingerlakkumanngippagu Den Europæiske Menneskerettighedsdomstolimut ingerlaqqissaaq
Thorkild Høyer, kalaallimut 42'nik ukiulimmut Herstedvesterimi parnaarussaasamut eqqartuussissuserisuusup kissaatigaa sullitami parnaarussaanera Højesteretimut ingerlatinneqassasoq.
Politiken.dk allappoq.
Angut 42'nik ukiulik Aasianni eqqartuussivimmi januaari qammat iperagaagallassasoq aalajangiunneqarpoq, suliassarli Nunatta Eqqartuussivianut ingerlateqqinneqarpoq. Tassani aalajangiunneqarpoq angut Herstedvesterimi parnaagussaaginnarallassoq piffissami aalajangigaanngitsumi.
Højesteretip suliaq suliariumanngippagu eqqartuussissuserisup Thorkild Høyerip Strasbourgimi Den Europæiske Menneskerettighedsdomstolimut ingerlateqqissavaa. Taanna isumaqarpoq sammisaq tassani suliarilluarneqarsinnaasoq:
- Kalaallit parnaarussat tassunga pigaangamik ilaqutariittut inuunerat sequmivinneqartarpoq. Uani ilaqutariit inuunerannik ingerlatsisoqarpoq, naalagaaffiup pisussaaffigaa ilaqutariittu inuuneq illersussallugu naalagaaffik sapinngisaq tamaat taamaaliortussaalluni, Thorkild Høyer politiken.dk'mut oqarpoq.
Kalaallit pinerluuteqarsimasut Danmarkimut parnaarussassanngorlugit nassiunneqartarnerat ukiorpassuarni assuarliutaasarpoq, pissutigalugu Kalaallit Nunaata aamma Danmarkip imminnut ungasinnerujussuat pissutigalugu kalaallit parnaarussat ilaquttaminnut attaveqarsinnaanngimmata.
Angut 42'nik ukiulik 2005'imi piffissaligaangitsumik Herstedvesteriliartinneqarpoq. Meeqqani tallimat annermik telefonikkut attaveqarfigai kisianni pingasoriarluni Aasiannut angalatinneqarnikuuvoq, meeqqaminik ilaqarsinnaaqqullugu, kingullermik majimi. Angalagaangami parnaarussivimmit sulisunit marlunnik ilagineqartarpoq piffissaq tamaat nakkutigineqarluni. Tamatuma saniatigut pineqaatissinneqarsimasut inissiisarfianni unnuisinneqartarput ullukkut ilaqutat taamaallaat attavigineqarsinnaallutik.
Herstedvesterimi parnaarussat tamarmik Kalaallit Nunaanni ilaquttaminnik takunissaminnut periarfissaqanngillat. Taamaaliorsinnaanissamut piumasaqaatit tamanit malinneqarneq ajoramik soorlu ilaatigut ikiaroornartunik atuinnginnissamik piumasaqaat.