Peqqissartut illutaavat ammaanersiorneqartoq
Tallimanngorneq kalaallit Københavnimi peqqissartut ineqarfittaavat pisortatigoortumik ilasseqatigiinnermik ammaanersiorneqarpoq
Tallimanngornermi 11. maj, siullertut assallaanermit ukiup aappaata qeqqa qaangiutilersorlu Københavnimi kalaallit peqqissartut illuat nutaaq Peqqissutsimut Naalakkersup Agathe Fointainip pisortaatigoortumik ammarpaa.
Peqqissartut Illuat nutaaq kisermaattarissanik, immikkut anartarfeqarlutillu uffarfilinnik ilaquttanullu siniffiliorfigineqarsinnaasunik 53-inik initaqarpoq. Aamma sisamanik immikkoorluni najugarineqarsinnaasunik inissiartaqarpoq, kræftimik nappaatilinnut pingaarnertut tunngatinneqartunik. Peqqissartut Illuat Fælledparkenip eqqannguani inissisimavoq, Rigshospitalimut minutsit qulit missaanni pisuttariami.
- Annertuumik nuannaarutissaavoq Peqqinnissaqarfiup peqqissartut ullutsinnut naleqquttumik Københavnimilu Rigshospitalimut qanillunilu qiterpasissumi inissisimasumik maanna illusimmavissaqartilermagit, Peqqissutsimut Naalakkersuisoq Agathe Fontain oqarpoq.
- Peruluummik nappaateqarluni pisariaqartinneqartarpoq matu matullugu kisimiissinnaanissaq. Qujanarpoq peqqinnissaqarfiup peqqissartut maanna kisermaattarissanik inissaqartilermagit periarfissaqartilerlugillu ilaquttaminnik unnuisoqarsinnaanissaanut.
Kalaallit Peqqissartut Illuat suliffeqarfittut Dronning Ingridip Napparsimavissuata ataani inissisimavoq, napparsimasunullu Danmarkimi nakorsarneqartunut akunniffissatut unnuisarfissatullu neqeroorutaalluni. Aamma napparsimasut Danmarkimiikkallarnerminnut tunngasunik Peqqissartut Illuannit siunnersorneqarlutillu ikiorneqartarput.
Peqqissartut Illuata nutaap atoqqaarfissiorneqarnera inissisimaffiani nutaami, Omøgade 3-mi, København Ø-mi, ilassinninnikkut malunnartinneqassaaq, tassanilu oqalugiartoqassaaq, erinarsoqatigiinnit erinarsortoqassalluni kalaallillu nerisassaataannik sassaalliisoqassalluni.
Sermitsiaq.AG ammaanersiornermi peqataavoq.