Nuummi qaammatigissuaq
Unnuaq qaammatip tungaanut miaggoorpit? Qaammat unnuaq Kalaallit Nunaata qulaani assut angivoq
Sapaammut unnuaagaa Nuup qulaa qulisimalluni taartuinnaavoq, qaammatilli tarrinnissaa minutsinik qulinik sioqqullugu pujoq alikkaqaaq, qaammassuarlu aappalaartuinnaq angeqaluni takussaalerluni.
Ilisimatuut naapertorlugit sapaatip akunnerata naanerani "ukioq manna qaammatit imissinerisa torrannersaat" nuisussaavoq.
Qaammatip Nunarsuarmit ungasissusaa agguaqatigiissillugu 384.400 km isorartussuseqarpoq, Nunarsuarmilli kaajallaanermini ammaloqqissaamik ingerlaneq ajorpoq. Nunarsuatsinnut ungasissusaa 50.000 km missaannik nikerartarami. Tamassuma nassataanik Qaammat 15 procentip missaannik anginerusungasarpoq qaammanerani assigiinngissut 30 procentiulluni.
Sapaammi Nunarsuup Qaammatillu ungasissusaat taamaallaat 356.954 kilometeriinnavoq. Tamanna nal. 05:30 missaanni pivoq qaammatip imissinerata kingorna nal. ak. affaq qaangiuttoq, nal. ak. ataatsip missaa Nuummit takuneqarsinnaajunnaarnermi kingorna.
Tassa qaammatip imissinera immikkut ittumik malunnarnerulluni arfininngornermi maajip tallimaanni kujataata-kangiani nal. 23:40 nuinermi kingorna.
Qulisimasimanngitsuuppat takuneqarsinnaasimagaluarpoq qaammammik takusaq alla: Tassa qaammat qilammiinnerminit killingusaap eqqaanut pinermini anginerorpasissoq.
Qaammatilli killingusaap eqqaani anginerorpasinnera "igisisat sallunerannit" aallaaveqarpoq, Qaammatip Nunarsuarmut qaninnerulerneranit aallaaveqanngitsoq. Kisianni tassa qaammatip imissinera ANGINERULAARPAT, sunniutaanik minnerulersitsinavianngilaq.