Dorisip danskit tusaarnaartitsinissaat unitsinniaraa
Greenpeacep Vegami Københavniittumi aaqqissuussineranik tapersersuineq kalaallinut inuiaqatigiinnut eqqunngitsuliorneruvoq, Doris Jakobsen (S) isumaqarpoq
Avatangiisinik illersuiniaqatigiit Greenpeace aamma nuannatsitsinissamik aaqqissuisartut Cultur for Climate tapersersortitsinut tusarnaartitsineq aaqqissugaat "Save the Arctic" (Issittoq annassiuk) nunatsinnit mamagineqaqaaq.
Taama allappoq dagbladet Politiken.
- Inuit allat issittumik nuannersumik allanngujuitsumillu takorluugaat nanuaqqanik nuannaartunik ulikkaartoq inuussutigisinnaanngilarput. Uagut silap pissusaata allanngoriartorneranut naleqqussartussaavugut, ilissi ukiorpassuarni inooriaatsissinnut. Taamaaliunngikkutta siunissami namminiilivinnissarput angusinnaanngilarput.
Taama ammasumik allappoq Doris Jakobsen (S), Magtens Korridor'ikkunnut taakkkua maajip 16'ianni Københavnimi nipilersortarfiit ilaanni Vegami aaqqissuinermi nipilersoqataasussaasunut.
Doris Jakobsen nangilluni allappoq aningaasanik katersiniarluni aaqqissuussineq Save the Arctic, kalaallinut inuiaqatigiinnut kanngunartuliornerusoq.
Magtens Korridorer, ukioq manna siusinnerusukkut inunnik ulikkaavissumik Vegami tusarnaartitsigamik Greenpeace tapersersorpaat arlalinnik tunngaveqarlutik.
- Angisuunik takorluugaqaraanni nalinginnaanngitsunik aaqqissuussilluni sakkullu atornagit akerliuniartarnerit iperassanagit. Greenpeacekkut inuiappassuit aamma aalajangiisartut nunarsuarmi sumiluunnit eqqarsalersittarpai, angisuumik eqqarsarlutik sakkut atornagit akerliussutsimik takutitseriaamminnik iperaaniannginnamik, ersersitsisarlutillu maannangaaq qanoq iliuuseqartoqartariaqartoq. Pingaartumik maannamut avatangiiseq pillugu politikkip allanngortinniarnerani annikitsuinnarmik alloriartoqartartillugu, naak anguniagassatut pilersaarutit tusarneraluartut, biilit innaallagissamik ingerlatillit pilersinniarneqaraluartut aamma pærit sipaarutaasut atorniarneqaraluartut, tamakkumi nunarsuatsinnik kinguaassatta nangitassaanut annassutaasussatut isigineqarmata Magtens Korridorinit oqarput.
Illit qanoq isumaqarpit? Doris Jakobsen ilumoorpa? Imaluunniit akulerunniarsimassanngila?