Kalaaleq arnaq unnuaq toqutaavoq
Nunattaqaa tigusarineqarpoq Svendborgimi eqqartuussivimmi killisiorneqassalluni
Odensemi politiit Sermitsiaq.AG'mut oqaatigaat arnaq kalaaleq 45'nik ukiulik unnuaq Odensemi toqutaasimasoq.
Erngunneq toqutsinermik kinguneqarsimavoq angut kalaaleq aamma arnaq toqutaasup ilagisimavai. Arnap taanna danskiussangatinneqarpoq.
Arnaq 45'nik ukiulik tallimanngornermi ullaakkut Odensemi inimini Rødegårdsvejimi toqutaasimasoq naammattoorneqarpoq. Savimmik kapoorneqarsimavoq. Angut aamma arnaq toqutsisimasutut pasisaallutik tigusarineqarput.
Taama ilisimatitsivioq vicepolitiinspektør Henrik Justesen, Fyns Politi, Sermitsiaq.AG'mut.
Ritzau allappoq:
- Tallimanngornermi ullaakkut nal. 5 miss. politiit arnap inaani eqqissiviilliortoqarnera pissutigalugu aggersarneqarput. Politiit inimut takkukkamik arnaq toqungasoq naammattoorpaat. - Taakkunga pigatta arnaq natermi nalavoq savimmik kapoorlugu toqunneqarsimalluni.
Toqutaasup saniatigut inimi inuit marluk isersimasimapput - angut 31'nik ukiulik aamma arnaq 35'nik ukiulik. Tamarmik toqutsisimasutut tigusarineqarput.
- Inissiamiipput taakkunga apuukkatta inunnik allanik tassaniittoqarsimaneranut takussutissaqanngilaq. Taamaattumik taakkua toqutsisimasutut tigusaraagut, Henrik Justesen oqarpoq.
Toqutsinermut suna tunngaviunersoq suli ilisimaneqanngilaq.
- Maannakkorpiaq politiit paasiniaasartui pinerluttoqarsimatillugulu misissuisartut inissiamiipput. Siusippallaarujussuarpoq toqutsinermut suna tunngaviusimanersoq oqaatigissallugu. Misissueqqaartariaqarpugut uppernarsaatissanillu qulakkeerinnilluta - pisariaqartitatsinnik, Henrik Justesen oqarpoq.
Angut arnarlu toqutsisimasutut tigusaasut Svendborgimi Eqqartuussivimmi tallimanngornikkut kingusinnerusukkut killisiorneqassapput, Ritzau allappoq.
Henrik Justesenip oqaatigisinnaanngilaq arnaq toqutaasoq Kalaallit Nunaanni ilaqutaqarnersoq, tigusaasut suli killisiorneqarnerat pissutigalugu.