D: Inuit ima sulilersissinnaavavut

Atorfiit inuttaqanngitsut sukkanerpaamik inuttalerneqartariaqarput, Demokraatinit Jørgen-Ole Nyboe Nielsen tikkuaavoq kikkut tamat iluaanaarutissaat siunnersuutigiitigalugulu

Demokraatit sinnerlugit Inatsisartunut ilaasortaq Jørgen-Ole Nyboe Nielsen. Assi: Arkiv

- Paaserusunnaraluaq sulisitsisut nunarsuup illuatungaanut ilinniarsimanngitsut suliassaannik suliaqartussanik sooq aallertarnersut?

Taama apeqquteqarpoq Demokraatit sinnerlugit Inatsisartunut ilaasortaq Jørgen-Ole Nyboe Nielsen - Dino - oqallisissiami.

- Apeqqut pingaaruteqarpoq tunngaviusuullunilu tamanit – SIK-p ilaasortaasa ilinniarsimanngitsut suliffissaqanngitsullu taamatullu Naalakkersuisunut ilaasortap – imminut apeqqutigisariaqagaa.

- Kialluunniit takusinnaavaa naapertuutinngilluinnartoq, sulisitsisut nunami maani ilinniarsimanngitsut suliassaannik suliaqartussanik nunarsuup illuatungaanut aallertarnerat naak sumiiffimmi sulisussaqaraluartoq, suliassanik pineqartunik suliaqarluarsinnaasunik.

- Kialluunniit aamma takusinnaavaa, naapertuutinngilluinnartoq atorfiit sivisuumik inuttaqartannginnerat. Tunisassiornermut kingaallassaataavoq suliffinni ataasiakkaani aamma inuiaqatigiinni tamani, Jørgen-Ole Nyboe Nielsen.

Taamaattumik apereqqillanga
- Paaserusunnaraluaq sulisitsisut nunarsuup illuatungaanut ilinniarsimanngitsut suliassaannik suliaqartussanik sooq aallertarnersut ?

- Uanga nammineq ersarissumik akissutissaqanngilanga sooq taamaannersoq, kisianni sulisitsisut appisaluuteqattaarnagit imaluunniit aamma suliffissaaleqisut taava pissutaasinnaasut tusarusuppakka suliartunit aamma sulisitsisut peqatigiiffiinit.

- Tamattami isumaqatigiissutigisinnaagunarparput, pissutsit taamaattut iluarinanngilluinnartuusut.

- Immaqa suliffissaaleqisut allattorneqaleraangata taamaallaat suliamik suliaqarsinnaasut suliartoqquneqarsinnaasullu ulloq ataaseq sioqqullugu allattorneqartalersinnaapput. Suliartorsinnaanngitsut suliffissaaleqisut allattorsimaffiannit peerneqassapput. Ersarinnerusumik taava takuneqarsinnaalissaaq, qasserpiaat suliffissarsiortuunersut

Win win - kikkut tamat iluanaarnerat
Jørgen-Ole Nyboe Nielsen naapertorlugu, taamatut iluarsiineq iluaqutissarsivigineqarsinnaalissaaq, tassani sulisitsisut sinerissami suliffissarsiuussisarfinnut inuttassarsiissinerminnik nassiussisalersinnaapput taava sulisinnaasoq kinguninngua sulisitsisumut innersuunneqarsinnaalissaaq imaluunniit sulisitsisoq erngiinnaq akuersissummik tunineqarsinnaalissaaq avataaneersumik sulisussaminik tikisitsinissaminut.

Tamatuma kingunerisariaqarpaa atorfiit inuttassaqanngitsut ulluminut naleqqiullugu sukkanerusumik inuttalerneqartalernerat, tamanna inuiaqatigiinnut iluaqutsiissaaq –sulisussarsiarineqartoq nunaqavissuuppat akileraartalertussaammat – isumaginninnermullu aningaasartuutit ikilillutik.

Powered by Labrador CMS