Narsami atuarfik pisortartaarpoq arpatsitsisoqarlunilu
Allagartarsualisarluni angalaaqatigiittoqanngilaq illuatungaani arpattoqarpoq, atuarfiup pisortartaa nutaaq aamma katersortarfimmi pisut maajip aallaqqaataani Narsami aliikkutaapput
Siorna SIP Narsap allagartarsualisarluni angalaaqatigiinneq taamaatippaa illuatungaani arpatsitsinermik aaqqissuillutik - ukioq manna taamaalioqqipput katersortarfimminngaanniit arpatsitsineq ingerlanneqarluni. Inuit 20 missaat taakkunannga meeerarpaaluit arpaqataapput, Brugsenip ittuaraanit Adolf Silassenimit ajugaaffigineqartoq.
Naggataatigut kaffi kalaallillu kaagiat katersortarfimmi sassaalliutigineqarput, Narsami SIK'p siulittaasua Helga Egede naatsumik oqalugiarluni, peqataasut inuit 60'it missaanniittut eqqaasikkusullugu aningaasarliortoqartoq aamma SIP'mi ilaasortat saqqummilaarnerusariaqartut.
Taama oqaluttuarpoq Sermitsiaq.AG’p Narsamit tusagassiisartua, John Rasmussen.
Helga Egede aamma pingaartuusoraa inuppaaluit ajornartorsiorneq pissutigalugu Danmarkimut nuussimanerat, tamakkuali ilaat angerlamut uteqqittalersut Danmarkimi sukaterisoqarnera pissutigalugu. Kikkut tamaasa maajip aallaqqaataasiorluarnissaanik kissaappai naggataatigut kaffisuutereerumik bingortoqarnissaa nalunaarutigalugu.
Atuarfiup pisortaa nutaaq
Maajip aallaqqaataani Narsami atuarfiup pisortaa nutaaq atorfinippoq. Niels Egede Høegh, siornatigut Narsami ilinniartitsisutut atorfilik aammalu piffissap ilaa taamani Eskimopelsiusumi pisortaanertut atorfeqarnikuuvoq. Ukiut marlussuit Danmarkimi ilinniartitsisutut atorfeqariarpoq Østjyllandimi sulilluni ilaatigut kalaallit meerartaat inuusuttuarartaallu nuullutik atuarfinni peqataatinniarneqarnerannik suliaqarluni.