- Puisit amii tulluusimaarlusi atorsigit
IA’p folketingimut ilaasortaatitaa, Sara Olvig, ”Støt fangerne”-akerliussutsimik takutitsinermi oqaasii atuakkit
Aluu tamassi!
Ulloq qilanaarisimasarput nallerpoq – ullumikkut maani najuuttugut ersoqatiginninermik akaarinninnermillu takutitsiumalluta katersuuppugut. Kalaallit inuiaat tassaajuarsimavugut inuiannut allanut akersuunneq ajortut ilaannilu immaqa tunuarsimaarpallaalaartarsimalluta – maannali tunuarsimaarneq qaangiuppoq. Maani katersuussimavugut oqarumalluta: Naammaleqaaq!
Kitaamiunik allaanerunerput allaanerussutsittalu akuersaarneqarnissaa tapersersorneqarnissarpullu pillugu maanna suaaruteqarpugut. Suaaruteqarnerput tassaannaanngilaq amernik tunisinarneq, tassaannaanngilaq aningaasanik kaaviiaartitsiniarneq tassaannaanngilarlu pisiniarfissuutillit imminut assortuuttumik amernik tunisiunnaarnissamut aalajangersaanerannut akerliuneq. Naamik. Ullumikkut katersuussimanitsinni nunarsuarmioqatitta akornanni assigiinngisitaarnerup inissaqartinnissaa aamma pineqarpoq
Aamma atuaruk "Doris Jakobsenip oqalugiaataa"
Assit siulliit takukkit': ”Støt fangerne”
Inuiaat kalaallit inuit ikittunnguuvugut. Taamaakkaluartoq ukiuni untritilikkaani nunami issittumi inuuvugut inuussutissarsiornikkut periarfissagissaanngikkaluarluta. Kultuurinut allanut immitsinnullu allanguinermut ammavugut. Ineriartortuarsimavugut, ineriartortuassallutalu. Unali annaajumanngilarput: puisinniarnerup uatsinnut peqqissutsikkut, anersaakkut, inuuniarnikkullu pingaarutaa.
Inuussutissarsiut imminut napatittoq
Puisinnartarnerput tassaavoq inuussutissarsiorneq akisussaassusilimmik ineriartortinneqartuartoq. Inuussutissarsiutaavoq akuerisaq ingerlatsinikkullu pitsanngorsaavigineqartuartoq. Inuussutissarsiutaavoq uagut nunatsinnut naleqquttoq. Sooq uagut inuussutissarsiornerput naqisimaneqassava? Sooq misigissutsit silatussusermit annerutinneqassappat?
Aakua inuit, piniartut, ullut tamaasa qasujaallutik, uatsinnit illoqarfissuarmiuusunit allaanerulluinnartumik inuunillit. Tamatsinnut nerisassanik peqqinnartunik pilersuisut. Soorlu danskit akornanni inuuniutigalugu naasorissaasut nersutaateqartullu danskit pisinarfiutaannik pilersuisuusut.
Puisip puulukillu suut assigiinngissutigigamikkitit? Puulukiminernit eqquteqqunnaarlugit EU peqqussummik suliaqaraluarpat danskit qanoq qisuariassagaluarpat? Puisip nersussuullu assigiinngissutaat suugamik? Isit angisuut saamasut? Puisip, savap, savaasallu assigiinngissutaat suugamik? Savat savaasallu mattullugit uumatinneqarnerat? Tassa taanna Magasin-mut apeqqutigerusutara.
Kikkut tamat inissaqartariaqarput
Pisiniarfissuutillit amernik niuerunnaaqqusinerat tassaavoq EU-p eqqusseqqusiunnaarnerani uagut ilanngunneqanngikkaluarnitta atuutsilersinngittoorsimaneranik takutitsisoq, tassaavorlu kultuurikkut pinngortitamillu atuinermut sunniiniarneq! Oqimaaqatigiissakkamik aalajangiiniaritsi - ilissi aamma allannguuteqarsinnaavusi. Aqqusinersuakkut kultuurimut ataasiinnarmut inissaqartitsisukkut ingerlaaginnarasi juice-tortafimmit anillallusi qanoq naapitaqassanerlusi takusiuk. Maaniippugut!
Nunarsuarmioqatigiinni assigiinngisitaarnermut inissaqartitsisinnaagutta pitsanngorsaaqataassaagut – kivitseqatigiilluta iliuuseqarta.
"Puisit amii tulluusimaarlusi atorsigit"