Piviusulersaarutit oqallinnermik pilersitsisartut
Festivalertoqarnerani arfininngornermi filmiliat piviusulersaarutit nunarsuup kiatsikkiartorneranik, killeqarfiit qaangerlugit mingutsitsinermik sumiginnaasarnermillu qulequtaqartut sammineqarput
Kalaallit filmiliaat pillugit sapaatip-akunnera naallugu isumasioqatigiinneq Berlinimi ingerlanneqartoq filminik nuannarisalinnit inunnillu kalaallit kulturiannik soqutiginnittunit naggaserneqaleruttorpoq.
Arfininngornermi ualikkut isumasioqatigiinneq anginngitsoq ingerlanneqarpoq, tamatumanilu filmiliortartut kalaallit nunanillu allaneersut katersuupput misilittakkaminnik paarlaasseqatigiinniarlutik apeqqutinullu akissuteqarniarlutik. Kalaallit peqataasut tassaapput Pipaluk Kreutzmann Jørgensen, Inuk Silis Høegh, Malik Kleist, Aka Hansen, Pipaluk de Groot. Kalaallit Nunaanni filmiliornissamut sinaakkutissat oqaluuserineqarput.
- Ikittuararsuuvugut suleqatigiittariaqaraluarlutalu, kisianni tamatta immikkut suliniutivut aallunneruavut, taakkuummatami pingaartitavut, Pipaluk Kreutzmann Jørgensen ilaatigut inerniliivoq.
Siunnerfiit assigiinngitsut
Filmit piviusulersaarutit kalaallinit suliarineqartut marluk, Inuk Silis Høeghip filmiliaa Sooq akersuuttugut aamma Pipaluk Kreutzmann Jørgensenip filmiliaa Oqarit inuullutillu, piviusulersaarutinit nunanit allaneersut suliaannit Silent Snowimit aamma Greenland Year Zeromit sammisaminnut allaanerulluinnartumik sungiussisimasumillu periaaseqarput.
Kalaallit filmiliaat kalaallinut saaffiginnittuupput, Kalaallit Nunaallu pillugu filmiliat allat pingaartumik kalaaliunngitsunut saaffiginnittuullutik. Filmiliat piviusulersaarutit oqallinnermik pilersitsisartut assigiinngitsut taakku marluk pisariaqartinneqarnerat paasinarsivoq.
Kalaallit Nunaat ukioq 0
Filmit oqallissaarutaammata filmilianut apeqqutit teknikkikkut sinaakkutissanut tunnganerugaluariarlutik qulequttanut sammineqartunut tunnganerulerput. Isummat saqqummersinnissaannut filmit atussallugit sunniutilerujussuupput.
Tamatumunnga assersuutissaqqissoq tassaavoq filmi Greenland Year Zero. Apersorneqarnermini Inatsisartut siulittaasuat Josef Tuusi Motzfeldt oqarpoq, Kalaallit Nunaat arlalissuartigut nutaamik aallartiffimmiittoq, tamannalu filmimut qulequtsiunneqarpoq - Kalaallit Nunaat ukioq 0.