Cairn aningaasaliissutinik aqutsisumit akuerineqanngitsutut nalunaarneqartoq
Tuluit Nunaanni aningaasaliissutinik aqutsisut annerpaartaasa ilaannit uuliasioqatigiiffiit Issittumi ingerlatsisut ileqqorissaarnissaq tunngavigalugu akuerineqanngitsutut nalunaarneqarput. Skotlandimiut uuliasioqatigiiffiat Cairn Energy Kalaallit Nunaanni ingerlatsinini pissutigalugu akuerineqanngitsutut nalunaarsorneqarpoq
- Misigisimavugut avatangiisinut tunngasuni isumannaallisaanermullu tunngasuni aqutsineq kiisalu Kalaallit Nunaanni naalakkersuisut nakkutilliinerat toqqissisimanissatsinnut naammanngitsut. Taamaattumik Cairn Energy Issittumi uuliaqarneranik misissueqqissaarneq pissutigalugu Stewardshipfondenit aqutatsinnit peerneqarpoq.
Taama Karina Litvack, F&C-mi director of governance and sustainable investment, sapaatip-akunnerani kingullermi Skotlandimi aviisimut Herald Scotlandimut oqarsimasoq, Berlingske allappoq. Tassannga PensionDanmark taamaaliornissamik aamma eqqarsaateqarnersoq ilaatigut aamma aperineqarsimavoq. Tassami PensionDanmarkit F&C, pissusilersorneq isornartoq pillugu soraarnerussutisiaqalernissamut ingerlatseqatigiiffinnut ataavartumik nalunaarusiortartoq, suleqatigineqarpoq.
Tamatumunngalu PensionDanmark ima akissuteqarpoq:
- Taamaaliornissamut pilersaaruteqanngikkallarpugut. Cairn uuliasioqatigiiffinnut gassisioqatigiiffinnullu Mexicop Kangerliumarngani BP-p ajutoorujussuarnerata kinguneranik uagut aningaasaliisullu allat 25-t sinnerlugit qillerivinni isumannaallisaanermut avatangiisinullu tunngasuni F&C-mit sukumiisumik oqaloqatigineqartunut ilaavoq.
PensionDanmark Cairnimi 6 millioner koruuninik aningaasaliisimavoq. Tamatuma saniatigut 670 millioner koruunit nalinginut piginneqataassuteqarpoq ingerlatseqatigiiffissuarni Shellimi aamma BP-mi uuliasioqatigiiffissuarnilu allani tallimani, Kalaallit Nunaanni, Alaskami. Norgemi Ruslandimilu uuliasiortuni imaluunniit misissueqqissaarinissamik pilersaaruteqartuni. Kisianni oqaatigineqareersutut PensionDanmark F&C-ip Cairn Energymik peqataajunnaarsitsineranik malinninniarluni eqqarsaateqanngilaq.