Akiliisinnaajunnaarnermit eqqugaasut sungiusaannarput

HC Fynip akiliisinnaajunnaarnerata kinguneranik assammik arsartartut Minik Dahl Høegh aamma Rasmus Larsen timersoqatigiiffinnut allanut nuuttariaqalerput

Kalaallit Nunaat marsip naalernerani Japanimut sungiusaammik unammimmat Minik Dahl Høegh normu 9-mik kiatilik Rasmus Larsenilu normu 2-mik kiatilik. Foto: Knud Fl. Larsen

Sungiusarneq ingerlatiinnarneqanngippat pitsaasumik qasujaassuseqarneq qaammaterpassuarni pilersikkiartorneqartartoq tammalertortarpoq.

Tamanna Minik Dahl Høeghip Rasmus Larsenillu eqqumaffigisorujussuuaat. HC Fynimi akiliisinnaajunnaartumik assammik arsartoqartarunnaarpoq. Taamaattumik timersoqatigiiffimmi assammik arsartartut assigiinngitsut ajornanngippat allamukarniartariaqarput.

Minik Dahl Høegh ligaklubbimi KIF Koldingimi Danmarkimi pissartanngorniunnermut atatillugu unamminernut naggataarutaasunut peqataasumi sungiusaqataanissamut akuerineqarsimavoq. Minik Dahl Høeghip assammik arsartartutut siunissaa suli maannamut paasinarsinngilaq.

- KIF Kolding soorunami timersoqatigiiffiuvoq soqutiginartoq. Taakku sungiusarnerisa amerlanersaannut peqataanera nuannaarutigisorujussuuarar, kisianni isumaqatigiinniarnernik pimoorussaasunik pisoqanngilaq. Nunat allat aamma soqutiginarsinnaagaluarput. Tysklandimi Frankrigimilu klubbit soqutiginninnermik ersersitsisimapput. Frankrigimi pitsaanerni klubbit tallimanit ikinnerunngitsut saaffiginnipput. Maannakkorpiaq eqqissisimasumik tiguakka. Qujanartumik ukiup unammisaqattaarfiusup tulliata aallartinnissaanut piffissaq sivisuvoq, taamaattumik ukiup tulliani sumi unammisartuunissannut tunngasumik ilaquttakkalu eqqortumik aalajangiiniarnissatsinnut piffissaqarluarpoq, Minik Dahl Høegh Sermitsiaq.AG-mut oqaluttuarpoq.

GOG-mi Rasmus Larsenip ukiuni arlalissuarni unammisartuuffigisaani sungiusaqataanissaq toqqassallugu Rasmus Larsenimut pissusissamisoorsimavoq.

Powered by Labrador CMS