Qallunaat kalaallinit imernerulersut
Isiginnittaatsit sualunnersaasa ilaat tunngavissaaruppoq - qallunaat kalaallinit imernerupput
Ukiorpassuarni qallunaanit imerajuttutut quiassuaatigineqartareersimallutik kalaallit qallunaanut uparuartuisinnaanngorput.
Kisitsisinimi Naatsorsueqqissaartarfimmeersuni takutinneqarpoq kalaallit imigassamik aalakoornartortalimmik atuinerat ima appariartigisimasoq qallunaat maanna imernerulersimallutik. Taama Fyens.dk allappoq.
Kisitsisit naapertorlugit innuttaasut 14-it sinnerlugit ukiullit naatsorsuutigalugit Kalaallit Nunaat imigassamik aalakoornartumik ukiumut 9,8 liiterinik eqqussisarpoq, tamannalu 2000-imit 3,7 liiterimik annikinneruvoq. Taamaalilluni kalaallit imernerpaanerannik takussutissaq ukiorpassuarni atuussimasoq maanna muminneqarpoq.
Kalaallit atuinerat 2000-imiilli appariartuaartuarsimavoq. Kisitsisini imigassap eqqunneqartartup taamaallaat pineqarnera imerneqartartullu eqqaaneqannginnera maluginiagassaavoq.
Peqqissutsimut qullersaqarfimmit kisitsisini nutaani qallunaat 14-it sinnerlugit ukiullit tamarmik immikkut ukiumut 11,1 liiterimik imigassartartortarnerat takutinneqarpoq. Tamanna kalaallit imertagaannit 1,3 liiterimik anneruvoq, kalaallillu "qallunaat imerajuttutut" oqaatigisinnaanngorpaat.
Qallunaaq 14-it sinnerlugit ukiulik kalaallimit immiaaqqanik agguaqatigiissillugu 86-inik imernerusarpoq, kimittussusaa 4,6 naatsorsuutigissagaanni.
Kalaallit imigassamik atuinerisa appariarsimanerata peqatigisaanik kalaallit immiorfeeraata akilersuinerminik unitsitsereerluni 2011-mi ammaqqinnera nuannaarutigineqarsinnaavoq.
Kalaallit immiaraaliaat Nanoq Beer sermersuup sermianik aatsitamik immiugaavoq. Imeq nerumittoq taratsullu katitigaanerat immiaaraliassatut piukkunnarluinnartuunerarneqarput.