Ilumiu 119.000 koruuninik aningaasaliiffigineqartoq
Ilumiu, ernisussiortumit Esther Hammekenimit 2008-mi pilersinneqartoq ippassaq arfininngornermi Danmarkimi Odd Fellow Ordenenimit 119.000 koruuninik aningaasaliiffigineqarpoq
Ernisussiortoq Esther Hammeken, kalaallinut inuusuttunut naartusunut anaananngortussanut ilaqutariinngortussanullu ulluunerani højskolimik Ilumiumik aallarniisoq, ippassaq Danmarkimi Odd Fellow Ordenenimit 119.000 koruuninik aningaasaliiffigineqarpoq.
2008-miilli kalaallit inuusuttut naartusut 16-it Ilumiup aaqqissuussaanut ilaasimapput. Taakku ilaat 14-it maanna ilinniagaqarput, ataaserlu isumaginninnermi ikiortitut naammassisimalluni.
Pineqartup iluani suliniuterpassuarnut sanilliulluni Ilumiu peqataasut ataasiakkaat pisariaqartitaannik aallaaveqartarpoq pikkorissarnermillu ataasiakkaat pisariaqartitaat aallaavigalugit aaqqissuussisarluni.
Odd Fellow Ordenenip Aalborgimi tapiissutinik agguaaneranut nakorsaqarnikkut ilisimatusartut, atuakkiortut, nipilersortartut, ikiuiniaqatigiiffiit meeqqanullu suliniaqatigiiffiit suliniutiminnut aningaasanik qinnuteqarsimapput. Ilumiu Esther Hammekenilu qinnuteqartut akornanni aningaasanik amerlanerpaanik tunissuteqarfigineqarput.
Peqatigiiffik kalaallit meerartaat, Foreningen Grønlandske Børn, 45.000 koruuninik tunissuteqarfigineqarpoq, taakkuninngalu Jyllandip Avannaani immikkoortortamut aqutsisoq Stine Nikolajsen tigusisuuvoq.
Esther Hammeken oqaluttuarpoq, arfininngornermi tapiissutinik agguaasoqarnera persuarsiorfiusorujussuarmik naleqqumik atisalersorfiusumik ingerlanneqartoq. Tunissutinullu qujassuteqartussanngorami ima pissangatigalunilu killitsissimatigaaq qujassuteqarluni oqalugiaatissami allanneqareersimasup ilaani immikkuualuttut puigungajassimagini, kisiannili iluatsittoq.