Aningaaserivissuaq uuliasiornermut naaggaarpoq
Avatangiisinik illersuiniaqatigiit kisimik Issittumi uuliasiornermik ernummateqanngillat. Maannakkut aamma Tysklandimi aningaaserivissuaq Lloyds'ilu sillimmasiissarfissuit ilaat ilanngupput
Aningaaserivissuarnit siullersaalluni Tysklandimi aningaaserivissuaq West LB ersarissumik nalunaaruteqqammerpoq Issittumi avannarpasinnerpaami uuliamik ujaasinermik tunisassiornermillu aningaasaliiniarani.
Tallimanngormat Berlingske taama allappoq.
- Imaanut sikulimmut pulanerujartortoqartillugu suut tamarmik akitsoriartortarput, ajutoorsinnaasullu aqukkuminaallutik,, taam atunngavilersuuvoq Dustin Neuneyer West LB-mi piujuartitsinermut pisortaq aviisimut Environmental Financemut.
Ilaatigut tikkuarpaa uuliakkornermik saliineq akisuupilussuusinnaasoq imaanilu uulia pinngortitami kigaannerujussuarmik aooriartortarluni, imalunniit arrorsinnaanani, isseqartuartillugu.
- Suliniuteqarpoq piujuartitsinngitsunik. Ajutoorsinnaaneq aningaasartuutillu West LB-mut annertuallaarujussuaqaat, Dustin Neuneyer oqarpoq.
Aningaaseriviillu allat West LB-tut iliorsinnaapput. - Aningaaseriviit allat saaffigisimavaatigut suliassaqarfimmilu tassani isummernerput politikkerpullu soqutigilluarlugu, Dustin Neuneyer oqarpoq.
Lloyd’s nunarsuarmi sillimmasiisarfiit anginersaasa ilaat BP-p Mexicop Kangerliumarngani uuliamik ajutoorujussuarnerata kingorna nalunaarusiaq 60-inik qupperneqartoq uissuumminartoq saqqummersippaat, tassani allaaserineqarlutik Issittumi avatangiisini mianernartuni uuliamik gassimillu piiaanermi periarfissat minnerunngitsumillu ajutoorfissat.
- Issittumi uuliakoorsinnaaneq sumiiffinni mianernartunit allanit ilimanaateqarnerunngilaq, avatangiisinullu kingunerisinnaasai kiisalu saliinermi aningaasartuutit ajornartorsiutillu naalakkersuisunut, suliffeqarfinnut sillimmasiisartunullu annerunerungaarsinnaapput. Ajutoornissamut periarfissat annertoqaat nunat killeqarfii akimorlugit pisussat, ilakutaqarnerullutillu, Lloyds'ip nalunaarusiaa allappoq.