Paamiuni ineriartorneq ernummatigaa

Imarsiornermik ilinniartitaanerup Nuummut imaluunniit Sisimiunut nuunneqarnissaanik pilersaarutit Ruth Heilmannip tupigaa

Ilinniartitaanermut periusissiami siunnersuutigineqarpoq imarsiornermik ilinniartitaanerit tamaasa Sisimiuni Nuummiluunniit nutaamik imarsiornermut ilinniarfimmut nuullugit katersornissaa. Foto: Imarsiornermik Ilinniarfik

Siumut sinnerlugu Inatsisartunut ilaasortaq Ruth Heilmann Paamiuni Imarsiornermut ilinniartitaanerup siunissaa pillugu naalakkersuisunut arlalinnik apeqquteqarpoq.

Tassani tunngaviuvoq ilinniartitaanermut naalakkersuisup Palle Christiansenip naalakkersuisut ilinniartitaanermut periusissiaq tusarniaassutigimmagu oqallisissiaralugulu. Ilinniartitaanermut periusissiami siunnersuutigineqarpoq imarsiornermik ilinniartitaanerit tamaasa Sisimiuni Nuummiluunniit nutaamik imarsiornermut ilinniarfimmut nuullugit katersornissaat. Tamanna ilaatigut Sermitsiaq normu 16-imi atuarneqarsinnaavoq.

Taamaattoqarneratigut Ruth Heilmann nikussaarpoq, Paaserusuppaa Imarsiornermik Ilinniarfiup nuunnissaaanik pilersaarutit sioqqullugit sunik pilersaaruteqarnersoq. Ilinniarfik taanna Paamiut illoqarfianut pingaaruteqarluartuuvoq.

Aamma paaserusuppaa Paamiuni innuttaasut minnerunngitsumllu Imarsiornemik Ilinniarfimmi ilinniartitsisut sulisullu allat matusiniarneq pillugu isumasiorneqarsimanersut.

Aamma paaserusuppaa kommunalbestyrelsemi ilaasortat aammalu Kommuneqarfik Sermersuumi borgmesteri Paamiuni Imarsiornermik Ilinniarfiup illoqarfimmut allamut nuunniarneqarnera pillugu isummersorneqarsimanersut.

Ruth Heilmannip aamma apeqqutigaa, Imarsiornermik Ilinniarfiup illoqarfimmut allamut nuunniarneqarnera qanoq angitigisumik nunatta karsianut aningaasartuuteqarfigineqarnissaa naatsorsorneqareersimanersoq.

Paaserusuppaattaaq naalakkersuisut Paamiut illoqarfia eqqarsaatigisimaneraat. Inuutissarsiorneq eqqarsaatigalugu Paamiut illoqarfittut annaasassaa angisooq pillugu taartissaanik sunik pilersaaruteqartoqarnersoq, Ruth Heilmann aperaaq.

Nalunaarutigaa arlalinnik saaffigineqarneq aallaavigalugu taamatut naalakkersuisunut apeqquteqarluni.

- Nammineerlunga aamma tupiginermik taamatut pilersaaruteqartoqarnera tusarlugu. Neriuutigaara tamanna ilumoortuunngitsoq aammalu Naalakkersuisut tungaanniit sinnattuaqinerusoq.

- Paamiut illoqarfittut ineriartortitassatut isigalugu mittarfimmik aamma pilersitsivigineqarnikuuvoq. Aammalu Paamiormiut namminneerlutik ukiuni arlalinni suliniutigaat “Paamiut Asasara” naatsorsuutigigamikku taamatut suliniuteqarnerminni Paamiut illoqarfitsialanngussasoq najoruminartoq.

Suliniutit arlalissuit iluatsissimasut eqqaarsaatigalugit Naalakkersuisut taamatut suliniartunut nukillalaarnartigisumik eqqarsarnerat naapertuutinngitsutut isumaqarfigaara.

- Akerlianimmi nukittorsaallutik iliuuseqartariaqaraluaramik, soorlu Imarsiornemik Ilinniarfiup ilinniartunik amerlanerusunik tigusaqartalernissaa anguniarlugu kollegiaqarnerup pitsanngorsaavigineqarneranik imalimmik. Tassami qinnuteqartut affaannaat maannamut tiguneqartarnerat ilinniartut amerlanerusut periarfissinneqarnissaannik politikkeqarnermut naapertuutinngimmat, Ruth Heilmanna oqarpoq.

Powered by Labrador CMS