Siumumit isornartorsiuineq KNR-ip akerlileraa

KNR-ip nutaarsiassaqartitsineranik Per Berthelsenip sakkortuumik isornartorsiuinera KNR-imi nutaarsiassaqartitsinermut pisortamit Mikkel Bjarnø Lundimit paasiuminaatsinneqarpoq

Foto: Hans Jukku Noahsen

- Nunami maani nutaarsiassaqartitsineq Siumumit ernumanartorujussuartut isumaqarfigaarput.

Taama Siumumi politikkikkut oqaaseqartartoq Per Berthelsen siusinnerusukkut oqarpoq, pingaartumik Qanorooq tamatigoortuunngitsumik nutaarsiassalerisutut isornartorsiorlugu.

Isornartorsiuinerli KNR-imi nutaarsiassaqartitsinermik pisortamik Mikkel Bjarnø Lundimik killiinngilaq, taannalu neriuppoq "tullissaanik tunngavilersorluagaanerusumik isornartorsiuisoqassasoq".

Paasisaqarnissaq pinerullugu Mikkel Bjarnø Lundip Per Berthelsenimut akissutaa tamakkerlugu matumani ilanngupparput:

Læs her "Siumut kritiserer KNR’s nyhedsformidling"

”Asasara Per Berthelsen.

Qujanaq oqaaseqaatinnut, tamatumammi takutippaa nutaarsiassanik aallakaatitsinerput, isumaqarput malillugu pitsaasoq,isiginnaarsimagit. Taamaakkaluartorli allaanngilaq takusimanngikkit. Qanoruumillu isorininneq paasinngilluinnarpara.

Ilanngussaq eqqaasat siulleq, tassalu akileraarutit procentiat, takulaariartigu. Tassani Siumup qisuariaataa aallakaatitap tamarmi qulequtaaneereerpoq… ilissi taasarsi qineqqusaarutitut. Ilanngussami siulittaasussi qisuariarneranut aamma inissaqartitsisimavugut. Toqqaannartumillu naalakkersuisumik apersuinitsinni Siumup isornartorsiutaa naalakkersuisumut ingerlateqqipparput.

Illillu malillutit taaneqanngivissimanersi paasisinnaanngilluinnarpara. Ilumuunngilaq, toqqaannartumik kukkuneruvoq. Allaammi nutaarsiassaq aqaguani malitseqartinneqarpoq aqqusinermi inuit nunamilu kattuffiit annersaasa ilaasa marlussuit qisuariaataannik. Taamaattumik ataatsimut isigalugu isumaqarpunga pisimasoq tamanna uagutsinnit qulaajarneqarsimasoq aammalu ersarissumik, piviusorsiortumik peqqissaartumillu suliarineqarluni. Paasissutissanik attuumassuteqartunillu qisuariarnernik.

Taavalu Nutaarsiassani Naatsuni partii nutaaq pillugu ilanngussarput eqqaavat. Tassani isumaqarputit piffissaq iluatsillugu partii allarluinnaq, tassalu naalakkersuisut partiiat IA, saassutarissagipput??

Imaalluarsinnaavoq illit paasinnittaasinni tamanna isumassaqassasoq, taarsiullugu nutaarsiassap naatsumik saqqummiunnissaa toqqarsimavarput. Tamatta atugassarisavut tulleriiaassavagut, suullu tamaasa itisilernissaannut periarfissaqanngilaq. Taamaasiorusukkaluaraanni taamaasiorusunngikkaanniluunniit. Ulloq taanna nutaarsiassat allat pingaarnerutissimavagut (innuttaasunut pingaarutillit), taamaattumillu naatsumik eqqaaginnarlugu nutaamik partiiliortoqarsimasoq. Isumaqarpugut innuttaasut tamatuminnga tusarlerneqassasut. Tamanna nutaarsiassaavoq oqaluttuaraarpullu.

Apeqqutaavoq tulleriissaarineq isiginnittariaaserlu, tamannalu soorunami oqaluuserineqarsinnaavoq, uagulli nammineq nutaarsiassanik isiginneriaaserput nammineq toqqarparput, tamannalu ullut ilaanni aamma ilikkartariaqarpat.

Taamaattumik oqartariaqarpunga isorinninnerit paasinngilluinnarakku. Aap, isumaqarpunga pissusissamisuunngilluinnartoq, tunngavilimmillu isornartorsiuinerit nuannarisorujussuugaluarpakka.

Taarsiullugu tusagassiorfitsigut nalunaarut paasineqassappat Siumut illillu suli annertunerusumik tusagassiorfikkoortittarnissassinnik sioorasaarutitut isertupalaakkatut, taava sunniuteqanngilaq. Naamerluinnaq.

Neriuppunga tullianik tunngavilimmik piviusorsiortumillu isornartorsiuteqarumaartutit, Mikkel Bjarnø Lund allappoq.

Powered by Labrador CMS