KNR kipparsimasunit tusarnaarneqarsinnaasariaqarpoq

Debora Kleistip piumasaraa mellembølge atorlugu nassitsissut nutaamik taarserneqassasoq

KNR nunatsinni tamarmi tusaaneqasinnaasariaqarpoq Foto: Leiff Josefsen

2011-mi februaarip mellembølge atorlugu nassitsissutip atorunnaarsinnerani nunatsinni sumiiffinni arlalinni KNR-p radiokkut aallakaatitsinera tusaaneqarsinnaajunnaarpoq.

– Matuneratigut innuttaasut ilai KNR-ip radiukkut aallakaatitaannik tusarnaarsinnaajunnaarput, Inuit Ataqatigiinnit Debora Kleist oqarpoq.

Pineqarput savaateqarfimmiut, sinerissami umiartortut innuttaasullu pinngortiami piniarlutik angalaartut imaluunniit ukiumut peqqumaatissarsiniarlutik kipparsimasut.

– Innuttaasut taakku inuiaqatigiinni ineriartortuarni pisut pillugit paasissutissanik nutaarsiassanillu pissarsisinnaanngillat, Debora Kleist oqarpoq.

Silassamik nalunaarutit suli ullormut sisamariarlutik VHF kanalit atorlugit nalunarutigineqartarput, taamatulli aaqqiineq naammanngilaq sinerissamimi kangerluppassuarni tamani VHF tusaaneqarsinnaanngilaq.

Debora Kleistip ualimut Inatsisartuni siunnersuutigaa mellembølgekkut aallakaatitsinerup atorunnaartup taartissaanik pilersitsisoqartariaqartoq.

Læs også "Kritiserer KNR’s nyhedsformidling"

Kortbølgemi nassitsissut
Mellembølgep taartiginnaavaa kortbølgemik nassitsissut.

Tele Greenlandip 2007-mi naatsorsorpaa taamaattumik pilersitsineq 6 million koruuninik akeqassasoq ingerlannerani ukiumut 500.000 koruuneqarluni.

– Uumasuutillit, umiartortut allallu pinngortitami inuutissarsiuteqartut siunnersuummik iluaquserneqassapput, KNR radiup silassamik nalunaarutai pingaarluinnartut tusaasinnaalissallugit, Debora Kleist oqarpoq.

Kortbølge tusaasinnaassagaanni kortbølgemik tusarnaarut 400 koruuneqartoq pisiarineqarsinnaavoq.

Powered by Labrador CMS