IMAK aamma Namminersorlutik oqartussat isumaqatigiipput

IMAK'ip pisortallu sulisitsisut akornanni piffissami sivitsortumi isumaqatiginninniartoqareerluni maanna ilinniartitsisut akissarsiaat sulinerminnilu atugarisaat pillugit 1. april 2010'mit 31. marts 2014'ip tungaanut atuuttussamik isumaqatigiissuteqartoqarpoq. Isumaqatigiissut tallimanngornerup unnuaanni atsiorneqarpoq.

Isumaqatiginninniarnerni apeqqut pingaarnersaq tassaasimavoq ilinniartitsisut atuartitsinerminni piffissaq atortagaat pillugu isumaqatigiissutissaq. Nalunaaquttap akunneri atuartitsinermut atorneqartartut ilinniartitsisullu atuartitsinivimmut piffissamik atuinerulernermikkut akissarsiassaanut tunngasut isumaqatiginninniarnerni qitiutinneqarsimapput.

Paarlattuanik kattuffinnut allanut neqeroorutigineqartut allat saniatigut ilinniartitsisut akissarsiaat 2,55 %-imik immikkut qaffaavigineqassapput. Tamatuma saniatigut atuartitsisarnissat piffissaqarfigiumallugit ataatsimiittarnerit ilaannut piffissaq atorneqartartussaq annertunerpaaffissalerneqarpoq. Ukiuni sisamani tulliuttuni akissarsiat qaffariaatissaat tamakkerlutik 7,35 % -iupput, tamatumalu saniatigut allanngortiterisoqarluni.

Isumaqatigiissutip kingunerisaanik atuartitsinerit ilinniartitsisunit ilinniarsimasunit ingerlanneqartalissapput.

Ilinniartitsisut kattuffiata IMAK'ip siulittaasua, Sivso Dorph, isumaqatigiissut pillugu oqarpoq:

- Nuannaarutigeqaara maanna angusaqartoqarmat neriuutigaaralu taamak sivisutigisumik isumaqatiginniarnerit siunissami misigeqqissanagit. IMAK'imi siulersuisut ilaasortatik kaammattorpaat angusaasut akuereqqullugit.

Aningaasaqarnermut Naalakkersuisup Maliina Abelsenip kiisami isumaqatigiissuteqartoqarnera iluarisimaarpaa, atuartut taamaasillutik piumasaasut naapertorlugit atuartinneqarsinnaalermata.

- Akissarsiat qaffariaattaat neriuutigisatsinnit annertunerulaarput, piffissalli sulliviusartup siunertaqarnerusumik ingerlanneqartalerneratigut ilinniartitsisut pissarsiaqarnerunerat naleqqutiinnarpoq. Ilinniartitsisut piffissat atuartitsiviusartut amerlineqarnissaanut peqataarusunnermikkut inuiaqatigiinnut pisussaaffimminnik ajunngitsumik takutitsipput akisussaassuseqarnerminnillu takutitsillutik, Maliina Abelsen oqarpoq.

KANUKOKA'p siulittaasuata, Martha Abelsenip nuannaarutigaa kommunit ilinniartitsisunik atorfinitsitseqqissinnaalermata:

- Taamaasilluta ukiup atuartitsiviusussap tulliuttup piviusumik piareersarnissaa aallartissinnaalerparput. Taamaasillutalu ilinniartitsisut pikkoriffigisaat annertunerusumik atorsinnaalissavarput, tassalu ilinniartitsineq. Tamatuma saniatigut meeqqat atuarfiisa aqunneqarnerinut isumaginninnikkullu suliassanut kommunit nukittorsaanissaminnut aningaasatigut periarfissaqalerput. Tamatuma kingunerisaanik meeqqat atuarfiat pitsaanerusoq pilersinneqassaaq.

Isumaqatigiissutip tunuliaquttanit akueritinnissaa tullinnguuppoq. Ilinniartitsisut eqqarsaatigalugit tamanna ilaasortat tamarmik taaseqataanerisigut pissaaq sulisitsisuusullu eqqarsaatigalugit Naalakkersuisunit akuerineqaqqqaasaaq KANUKOKA'lu eqqarsaatigalugit siulersuisunit akueritinneqassalluni.