Imernerput suli annikilliartorpoq

Kalaallit Nunaanni Kisitseqqissaartarfimmit kisitsisit nutaat takutippaat Nunatsinni imigassamik aalakoornartutalimmik atuineq 2011'mi 2010'mit suli minnerulersimasoq

Grafik: Kalaallit Nunaanni kisitseqqissaartarfik

Kisitsisit erseqqipput: Ukiut tamaasa imigassamik aalakoornartutalimmik atuineq milliartoq.

Kalaallit Nunaanni Kisitseqqissaartarfimmit kisitsisit nutaat tamanna takutippaat.

Imigassat akoqanngitsut nunatsinnut siorna eqqunneqartut 430.000 literinik annertussuseqarput. Ukiup siulianut 2010-mut sanilliullugit 25.000 literinik annikinnerullutik. Appariaat 5,7 procent. Nunatsinni innutaasut amerlassusiannut naatsorsuinermi innutaasut 14it sinnerlugit ukiullit tamarmik siorna imigassamik akoqanngitsumik 10 literimik imersimassapput.

Imigassamik atuisut ikiliartuinnarneranni naatsoorsuutit saqqummiunneqartut malillugit, imigassanik aalakoornartortalinnik tamanik atuineq 2000'miilli annikilliartorpoq.

Imigassamik aalakoornartutalimmik atuinerup milliartuinnarnerani imigassat suugaluilluunniit pineqarput. Imigassanik akoqanngitsunik tunisineq 2011-imi 4.000 literinik ukiup siulianut sanilliullugu annikilleriarpoq, 2011'mi imigassaq akoqanngitsoq 39.000 liter eqqunneqarpoq ukiup siuliani 43.000 literiulluni.

Taamattaaq viinimik eqqussuineq annikilleriarpoq. 2011'mi 84.000 liter eqqunneqarpoq ukiup siuliani 87.000 literiulluni, appariaat 3,3 procent.

Naggataatigullu immiaaraq siorna eqqunneqartoq 307.000 literiuvoq 2010'mi 325.000 literiusoq. Appariaat 5,5 procentiusoq Kalaallit Nunaanni Kisitseqqissaartarfimmit kisitsisit nutaat tamanna ersersippaat.

Kisitsisit allat uani takuneqarsinnaapput.

Powered by Labrador CMS