Tartupaluk nunat tamalaat akornanni eqqartuussivimmut

Tartupaluk pillugu isumaqatigiinniarnerit pisortatigoortumik uninngapput. Tassami Danmarkip Canadallu akornanni isumaqatigiinniarnissat tullii ullulerneqarsimanngillat.

Aamma naak nunanut allanut ministeri Villy Søvndal ullumi Sermitsiaq.AG-mut oqaraluartoq "Canada pitsaasumik ineriartorfiusumillu oqaloqatigineqarpoq", nunanut allanut ministerip ilanngullugu eqqoriarpaa, ukiorpanngortuni killeqarfilerngusaanneq nunat tamalaat akornanni eqqartuussivimmut Haagimiittumut aalajangigassanngortinneqarsinnaasoq.

- Imaassinnaavoq nunat tamalaat akornanni eqqartuussivik inaarutaasumik aalajangiisussanngortittariaqassagipput, sulili tamaanga killinngilagut, kisianni suliap ukiumi matumani naammassisinnaanissaa neriuutigaarput, Villy Søvndal oqarpoq.

- Pitsaasumik inerneqarnissaa qularinngilarput, piumasaqaatit taama ittut pineqartillugit, nunat tamalaat akornanni eqqartuussiviup inaarutaasumik aalajangiisussaaneranik ataqqinnittussaagatta, ilimagaaralu apeqqummi tassani kikkut tamarmik ataqqinnikkumasut, Villy Søvndal Sermitsiaq.AG-mut oqarpoq.

Læs også "Dansk chefforhandler afviser Hans Ø-aftale"

Læs også "Kuupik: God canadisk dialog i flere år"

Ilumoorneraraa
Ukiorpanni oqaloqatigiittoqarsimanera sulili aaqqiissutissatut siunnersuummik saqqummiussisoqannginnera naalakkersuisut siulittaasuata Kuupik Kleistip sapaatip-akunnerani kingullermi uppernarsarpaa.

- Ukiut arlallit ingerlaneranni Tartupaluk pillugu Canadamik pitsaasumik oqaloqateqarsimanerput uppernarsarsinnaavara. Maannamut isumaqatigiissuteqartoqanngilaq, taamaattumik maannamuugallartoq aaqqiissutissatut siunnersuutaasinnaasut pillugit oqaaseqarnissaq tulluartuunani, Kuupik Kleist sisamanngormat oqarpoq.

Læs også "Avis: Danmark og Canada vil dele Hans Ø"

- Killeqarfiliinissamut ajornartorsiummut pullavigisarput issittumi periusissatsinnut pissusissamisoortumik attuumassuteqarpoq, tunngavigisarpullu tassaavoq inuiaat akornanni eqqartuussivik tunngavigalugu Issittoq pillugu qanimut suleqatigiinneq, naalakkersuisut siulittaasuat erseqqissaavoq.

Oqallinnermut maanna ingerlanneqartumut tunuliaqutaasoq tassaavoq Canadami aviisip National Postip sapaatip-akunnerani kingullermi allannera Tartupaluk Danmarkip Canadallu akornanni avinneqassagunartoq. Aviisilli allaaserisani illuatungeriinnit uppernarsartissinnaasimanngilaa.

- Tartupaluk eqqarsaatigalugu siumut aqqutissamik illuatungeriinnit akuersaarneqarsinnaasumik ineriartortitsinissaq Canadap Danmarkillu suleqatigiissutigaat, Joseph Lavoie, Canadami nunanut allanut ministerimut JohnBairdimut oqaaseqartartuusoq Canadami aviisimut tassunga oqarpoq.

Qeqertaaraq akerleriissutaasoq Tartupaluk 1,3 kvadratkilometeriinnarnik angissusilik pingaarutilimmi inissisimaffeqarpoq. Silap pissusaata allanngornerata malitsigisaanik imartami angallattoqarnerulernissaa naatsorsuutigineqarpoq, imartallu naqqata uuliaqarlunilu gasseqarnissaa naatsorsuutigineqarluni. Killeqarfilerngusaanneq 1973-imi aallartippoq.