- Suliffissaaleqisut amerlavallaarujussuaqaat
Aleqa Hammondip paaserusuppaa naalakkersuisut qanoq iliorlutik suliffissaaleqisoq apparsarniarneraat
Siumup siulittaasuata Aleqa Hammondip maannakkut suliffeqarnikkut pissutsit ernumanartoqartippai, ukioq manna 2011-mut naleqqiullugu suliffissaaleqisut amerlanerullutik.
Taamaattumik paragraf 37 naapertorlugu imaattumik apeqquteqarpoq:
- Suliffissaaleqisut ullumikkut 3.473-upput tassa siornamut qaammatip taamaasineranut sanilliullugu 452-inik amerleriaateqarlutik, tassungalu tunngatillugu Naalakkersuisut aperissavakka suliffissaaleqinerup akiorniarnerani aammalu imminut pilersorsinnaassutsip annertusarnerani sunik suliniuteqarnersut aammalu qanoq akiuiniarnerminni pingaartillugu anguniarneraat.
Aleqa Hammondip apeqqutini ima tunngavilersorpaa:
- Siumumi isumaqarpugut nunap atugarissaarneranit uuttuutit pingaarnerpaat tassaassasut innuttaasut suliffissaqarnissaat aammalu imminut pilersorsinnaanissaat tunngaviusoq.
- Maanna suliffissaaleqineq nuna tamakkerlugu aatsaat taama annertusilertigaaq Naalakkersuisooqatigiit suleqatigiinnerminni qulequtarisaasa qupperneq 4-mi ilagaat imatut oqaasertalik:”Inuit tamarmik imminnut ilaquttaminnullu pilersuinissaminnut periarfissaqarnissartik kissaatigaat, tassuunakkullu namminneq inuunissaminnut, nutaanik pilersitsinissaminnut, pinngortitsinissaminnut soqutigisamillu aallunnissaannut kiffaanngissuseqarumallutik”.
- Siuliani apeqqutinnut atatillugu anguniakkassinnut qanoq politikkissinnik erseqqissaassuteqartoqarnissa kissaatigalugu apeqquteqarpunga, Aleqa Hammond nassuiaavoq.