Dannebrogimi suliaq: Atoqateqarsimanertik nassuerutigaat

Kunngip umiarsuaani Dannebrogimi qallunaanut sakkutuunut marlunnut Nuup eqqartuussiviani eqqartuussineq uissuumminartoq sisamanngorpat ullaakkut nangissaaq

Angutit marluk 25-t missaanni ukioqartut kunngip umiarsuaani Dannebrogimi inuttaasut sapaatip akunnerani uani Nuup eqqartuussiviani unnerluutigineqarput arnamik ukioqamminnik pinngitsaaliisimasutut. Foto: Leiff Josefsen

Ullumikkut pingasunngornarmi angutinut qallunaanut marlunnut ullumi makkunani Nuuop eqqartuussiviani arnamut ilutiminnut pinngitsaaliillutik arnerisimasutut unnerluutigineqartunut suliaq aalajangerneqarnavianngilaq.

Eqqartuussineq ullup qeqqalersoq unitsinneqarpoq suliami takunnittup pingaarutillip maannakkut Flådestation Korsørimi sulisup apersornissaa amigaataammat. Eqqartuussinermi illersuisut eqqartuussisullu takunnissimasup apersornissaa pingaartutut isigaat, taassumami nassuiaanera angutinut marlunnut unnerluutigineqartunut iluaqutaasinnaammat, 2011-mi dronningip uiatalu nunatta kitaata sineriaani aasaanerani angalaarnerani sakkutuujupput.

Læs også "Dannebrog-mænd tiltalt for voldtægt i Nuuk"

Arnamik atoqateqarneq nassuerutigaat
Unnerluussisup qaammatini 18-ini pineqaatissinneqarsimasunut inissiisarfimmiittussatut pineqaatissiisoqarnissaa piumasaraa, arnamik atugarliortitsinerminnut 70.000 koruuninik akiliillutik atisaanullu alittortunut 1.000 koruuninik taasiillutik.

Illersuisut angutit marluk pinngitsuutinnissaat piumasaraat, marluullutillu atoqateqarsimanertik nassuerutigaat, pinngitsaaliisimanerlu miserratigalugu arnaq piumasimanerarlugu.

Eqqartuussineq sisamanngornermi qulingiluanut aallarteqqissaaq.

Eqqartuussineq pillugu tallimanngornermi Sermitsiaq atuarsinnaavat.

Powered by Labrador CMS