Nanoq Narsami inunnik kateritsitsivoq
Narsami nanoq kujataani illorfimmi tassani ullumi alutorsaataavoq
Sermitsiaq.AG’p Narsami attaveqarfia John Rasmussen oqaluttuarpoq, aalisartoq piniartorlu Richardt Efraimsen ullaaq aalisariarluni Nuugaarsuup eqqaani nanoq imaani nalorusaartoq naammattoorsimagaa.
Imaani aallaassagaluaruniuk kivisiinnarnissaa annilaanngagalugu sikumut qaqinissaa utaqqisimavaa, qaqimmallu ataasiarluni seqqorami toqussimallugu. Kingorna nanoq Narsami aalisartut talittarfianut kalinneqarpoq, Royal Greenlandip karaanersua iluaqqusiullugu qaqinneqarluni.
Illoqarfimmi erniinnaq nannuttoqarsimanera tusarliunneqarpoq, nanoq qaqinneqarmat innuttaasut atuartullumi alapernaaserlutik talittarfimmiipput. Kingusinnerusukkut meeqqerivimmiittut utoqqaallu illuannit uumasumik toqungasumik takusassarsiorlutik, John Rasmussen oqaluttuarpoq.
Nanoq arnaviaq inuusuttuuvoq sisamat missaannik ukioqarunartoq John Rasmussen naliliivoq. Nanoq pilanneqarpoq Poul Qeqe Tunumit kingoqqisoq Narsami nunalik ikiorsiullugu.
Ullumi nanoq pisarineqartoq ilanngullugu Paamiunit kujammut nannut pingasut pisarineqarput. Nannuttassat sisamaammata Kujataani nannuttassaq ataaseq kisimi sinneruppoq.