GA: Eqqartuussinerup inernera ersarippoq

Grønlands Arbejdsgiverforening akinik isumaqatigiissuteqartarsimanermik suliap naammassinerani 1 million sinnerlugu akiliisitsinertallip kingorna sassartaarpoq

GA-mi pisortaq Brian Buus Pedersen. Foto: GA

- Kalaallit Nunaanni Sulisitsisut Peqatigiiffiata unammilleqatigiinnermut inatsimmik unioqqutitseriarnerit suulluunnit akuersaarsinnaanngilluinnarpai, inatsisimmi taassuma Kalaallit Nunaanni inuussutissarsiornikkut niueqatigiinnermi atugassarititaasut eqqortut aallaavigalugit ineriartornerup ingerlaannarnissaa tunngavilermagu.

Taama oqarpoq GA-mi psiortaq Brian Buus Pedersen GA’mi siulersuisut tamaasa sinnerlugit.

Kalaallit Nunaanni eqqartuussiviup suliffeqarfiit B.J. Entreprise A/S, Permagreen Grønland A/S aamma Kang-Total-Byg ApS, taakkulu suliffeqarfiit pisortai aqutsisuilu suliarinnittussarsiuussinermut atatillugu neqerooruteqarnermi aaqqissuussisimasutut akiligassippai.

Taamatut ittumik eqqartuussineq Kalaallit Nunaanni siullersaavoq, aammalu unammilleqatigiinnermut atatillugu aatsaavissuaq akiliisitsisoqarluni.

Læs også "Permagreen: Det var manglende omtanke"

Akuersaarneqarsinnaanngilaq
GA-mi siulersuisuunerit pisoq pimoorullugu oqallisigisimavaat, tassungalu atatillugu aalajangiunneqarsimavoq suleqatigiisitaliortoqassasoq, taassumalu suliarissavaa siunissami ilaasortat unioqqutitsitillugit, peqatigiiffiup iluani qanoq iliuuseqartoqartarnissaanik maleruagassiornissaq

- Maanna pisimasut soorunami akuersaarneqarsinnaanngillat, tamannami aamma eqqartuusinerup ersarissumik takutippaa. Eqqartuussinermi pineqartunut ataatsiakkaanut akiligassiissutit annertussusaannik aalajangiinerit eqqortuunersut eqqartuussiviup aalajangingassaraa, GA-milu soorunami qangali eqqartuussisoqarsimatillugu pissusaasartoq tapersersortarput, tassalu suliffeqarfiup inuulluunniit eqqartuussissutaasoq pereeraangamiuk (soorlu akueralugu akiligassanilu akilersimallugu), taava annerusumik pineqaatissinneqaqqissanngitsoq.

- Taassumalli saniatigut pisup kingunerisaanik, peqatigiiffittut eqqarsaatigisariaqarlersimavarput ilimaginngisatsinnik taama pisoqaqqissagaluarpat, ilutsinni qanoq iliuuseqartassanerluta, Brian Buus Pedersen oqarpoq.

- Minnerunngitsumik GA-p ukiuni kingullerni Kalaallit Nunaanni inuussutissarsiutitigut ingerlatsinerup pikkoriffigalugu ineriartortinnissaa sulissutigisimammagu. Tamanna inuit tamat oqartussaaqataanerat, nunallu inatsisai ataqqillugit, suliffeqarfiit ilaasortarisagut peqatigalugit, ammasumik politikerinut, oqartussanullu attaveqatigiittarnitsigut ingerlapparput.

- Taamatumap saniatigut inuiaqatigiinni oqallinnermi isornartorsiuisinnaanerput, tigussaasunillu tunngavilinnik oqalliseqataasinnaanerput pissusissamisoortutut isigaarput, tassami immitsinnut kattuffittut nunap tamarmi ineriartortinnissaannut pimoorussisutut aallussisutullu isigigatta. Tamatumani GA’p inuiaqatigiinni oqalliseqataasarnissaa apeqquserneqarsinnaanngisaannassaaq, Brian Buus Pedersen oqarpoq.

Læs også "B. J. Entreprise: Vi lover ikke at gøre det igen"

Læs også "Bøder på over en million kroner i snydesag"

Kinguneqarpoq

Eqqartuussinerup pineqartup kingunerisaanik Permagreen-ip direktøria, Preben Kold Larsen, GA’p politikkikkut sulinerani akornusiiniarani, GA’p siulersuuneranit, sanaartornermik suliaqartunut atatillugu brancheudvalgimi ilaasortaanerminit tunuarniarluni aalajangersimavoq.

-Taassumalu saniatigut B.J. Entreprisep direktøria John Eliassen, aamma pineqaatissinneqarsimasoq sanaartornermik suliaqartunut atatillugu brancheudvalgimit tunuarniarluni aalajangersimalluni.

- Kialuunniit nalornissutigissanngilaa, GA-mi pisut pimoorukkatsigit, aammalu suliffeqarfiit ilaasortarisattta ajunngitsussaq anguniarlugu suleqataanissaat sulissutigissagatsigu, siunissami taama ittunik pisoqaqqittoqannginniassammat, Brian Buus Pedersen oqarpoq.

Powered by Labrador CMS