Lars pillugu suli paasisaqartoqanngilaq
Inuit 20't Lars Svendsenimut attuumassuteqartut Aalborgimi ujaasigaluarput suli kinguneqanngitsumik
Inuit 20't missaat ujaarineqartumut 28'nik ukiulimmiut Lars Svendsenimut attuumassutillit Danmarkip nalunaaqutaa naapertorlugu nal. 17 Aalborgimi nunaqqatiminnik ujaasinertik taamaatippaat. Ajoraluartumik kinguneqanngitsumik.
Taama oqaluttuarpoq Erno Jacobsen Petersen, namminneq kajumissutsiminnik ujaaseqataarusuttunik aaqqissuussisoq.
Ujaasineq aqagu nal. 10 Aalborgimi Nordkraftip eqqaaniit aallarteqqissaaq.
Ujaasineq alla helikopterit, umiatsiaat aamma aqqartartut atorlugit ingerlanneqartoq Lars Svendsenimik aamma nassaarfiunngilaq.
Ippassaq Nordjyllands Politiini pigaartut pisortaat Frank Liltorp Sermitsiaq.AG'mut oqaluttuarpoq, tallimanngornermi unnuaa Limfjordimut pissittumik takusoqarsimasoq, taakkualu annilaanngatigalugu tassaasinnaasoq Lars Svendsen.
Lars Svendsenip ilaqutaasa qanigisaasalu assorsuaq inuttaa attavigerusukkaluarpaat, illit Lars Svendsenip sumiiffia nalunngikkukku qinnuigineqarputit Aalborgmi politiit saaffigeqqullugit +45 96 30 14 48 imaluunniit Mads Rosing Mogensen 28 81 47 01.