- Illoqarfiliassaagut

Sapaatip-akunnerata naanerani nipilersortartut tusaamasa qanimut naapinnissaannut periarfissaqarluarpoq. Aquakkummi arfininngornermi tusarnaartitsereerunik Nuummi illoqarfissiorniarput, unnummullu René Dif tipisiulereerniarpoq.

Immaqa allat ilaaqqutissapput.

- Takusassarsiornissara qularnanngilluinnarpoq. Misigisassarsiorluarniarpunga, René Dif qungujulluni oqarpoq.

Søren Rasted naapertorlugu nipilersoqatigiit tusarnaartitsinerit kingorna tamatigut imminnut neriorsoqatigiittarput toqqaannartumik angerlarniarlutik, aqagussamut nukissaqarumallutik qasuerserniarlutik.

Neriorsoqatigiinneq tamatigut unioqqutittarpaat.

- Isumaqavippunga angerlaannartoqanngisaannarsimasoq, oqarpoq.

Lene Nystrøm ilaaqquppoq:

- Tusarnaartitsereerluni timi adrenalinimik ulikkaartarpoq. Uagullu inuulluartaartartuuvugut.

Læs "Aqua: Vi glæder os vildt"

Takornariarneq
Nipilersoqatigiinnut ilaasortanit sisamaasunit René Dif kisimi Kalaallit Nunaanneereersimavoq. Sapaatip-akunnerata naanerani pisussat, ilaatigut umiatsiarnissaq, tamanit qilanaarineqarput.

Kalaaliminernik ooqattaarinissaq aamma tamanit kissaatigineqarluinnarpoq. Katuami tusagassiortunik katersortitsisoqarmat René Dif ilaatigut mattammik ooqattareqquneqarami ima oqariataarpoq:

- Oqarpit Mek Pek ... (qallunaaq nipilersortartoq, aaqq.)

Nipilersoqatigiit ullumi nal. 14 tusagassiortunik katersortitsigamik akunnialuinnarni nunatsinniissimapput. Maluginiaat siulleq tassaavoq Kangerlussuaq. Tassani inuit igalaaneerrapput kalaallit erfalasuannik aalaterisaqattaarlutik.

- Kunngikkormiuusutut misigivugut. Misigalugu nuannerluinnarpoq, René Dif oqarpoq.

Nipilersoqatigiinnut ilaasortat sisamat timmisartunut marlunnut ilaallutik Nuummut ingerlaqqimmata kunngikkormiutut misigisimaneq minnerulinngilaq. Timmisartummi arlaat ajoqusissagaluarpat taamatorluinnaq kunngikkormiunut ilaatigoriarluni pisoqartarpoq.

Tamatumanili inissat apeqqutaanerupput.

Lene Nystrøm naapertorlugu tikilluaqqusaaneq killitsinnarpoq.

- Inuit inussiarneqalutillu saamaqaat. Angerlarsimasutut misigisimangajappunga. Aammami Norgemit aputeqartaqisumit aggersuuvunga. Kiisami maanga tikilluni ataqqinaaterujussuuvoq. Tusartarsimaqisatsinnut, oqarpoq.

Danmarkimi pitsaanerpaat
Tusagassiortunik katersortitsinerminni kalaallinik tusarnaarianik naapitsinissartik qilanaarilluinnaritsik nipilersortartut tusaasamasat oqaatigaat. Kulturikkut illorsuarmi tusarnaariat qanittuararsuullugit tusarnaartitsisarneq nipilersoqatigiit ajorinngilluinnarpaat.

- Tusarnaariat toqqaannartumik isaasigut takusinnaallutik nuannertaqaaq, oqarput.

Nuummiullu qilanaarisassaqarput, Lene Nystrøm malillugu.

- Nipilersorluaraangatta Danmarkimi tusarnaartitsisartut pitsaanerpaartarisarpaatigut!

Taama oqarnera pillugu nipilersoqatigiit ilaarsortaat allat ima aperisariaqalerput:

Nipilersornerlukkaangattami?

- Aap, taava Norgemi ajornerpaasarpugut ...

René Dif nanorlu
Tusagassiortunik katersortitsisoqareermat sumi kakiortissinnaanerminik René Dif misissuigasualerpoq. Nannumik kakiorneqalernissani pilersaarutigaa.

- Ilumooruppara. Nuummi maani Frozen Ink kakiortittarfiusoq sumit pinerpoq tusaamavara. Tassani kakiortikkusuppunga, oqarpoq.