Uuliakoortoqarsinnaanera Nunatta mannineq pinaveersaartissavaa

- Uuliakoortoqassagaluarpat nunanit allanit ikiortissamik utaqqinata nammineq qanoq iliuuseqapallalluta uuliakoornermik akiuussinnaasariaqarpugut, naalakkersuisut siulittaasuat Kuupik Kleist, Inuit Ataqatigiit oqarpoq.

Taamaattumik Kuupik Kleist Inatsisartut ataasinngornermi ualikkut ataatsimiinneranni siunnersuutigaa Naalakkersuisut aktieselskabi Greenland Oil Spill Reponse A/S, Kalaallit Nunaanni Uuliamik Mingutsitsinermi Upalungaaqqut A/S pilersippaat.

Naak, skotlandimiut uuliasiornermik ingerlatsiviat Cairn 2010'mi aamma 2011'mi arfineq-pingasoriarluni qillerinermini uuliamik gassimillu nassaanngikkaluartut, suut tamarmik ilimanarsisippaat ukiuni aggersuni Kalaallit Nunaata imartaani uuliasiornerit amerliartuinnavittussat. 2012'imi Kalaallit Nunaata avannaanit Kap Farvel kaajallallugu Tunup avannaarpiarsuanut immap naqqanik sajuppillatsitsinernit paasisat katersorneqassapput. Canadamiut suliffeqarfiutaat Husky pilersaarutini naapertorlugit misissueqqaarluni qillerinerit siulliit 2013 ingerlatissavai, Cairn 2012'imi uninngagallariarluni ukiup tullianiit qillereqqilernissaa naatsorsuutigineqarpoq.

Kalaallit Nunaanni maannamut namminerisaminik uuliakoortoqassagaluarpat upalungaarsimasoqanngilaq. Skotlandimiut uuliasiornermik ingerlatsiviat qillerinermi nalaani 3-trinsraketimik piareersimasuutitaqarput: Annikitsumik uuliakoortoqartillugu qillerivimmi nammineq imaluunniit ikiuullutik umiarsuartaniittut atorneqarsinnaallutik. Uuliakoornerni anginngitsuni atortussat Aasianni, Kangerlussuarmi Nuummilu inissisimapput. Annertuumik uuliakoortoqassagaluarpat atortussat Englandimi Southamptonimut aaneqassapput.

Uulikoortoqassagaluarpat upalungaarsimasussat - suliassaqarfik nutaaq
Imaani qillerisoqartillugu ajornerpaamik pisoqassagaluarpat atortussat Southamptonimit Kalaallit Nunaannut nal. ak. 52 atorlugit timmisartuunneqassapput. Naalakkersuisut kissaatigaat nunatsinni nammineq uuliakoortoqarnissaanut upalungaarsimanermik suliffeqarfiliortoqarnissaa taamalu nunat allat upalungaarsimanermik sulialinnik pisariaqartitsineq millisarlugu. Piginneqatigiiffiup atortussai siulliit pigineqaleriaannaapput: Cairnip namminersorlutik oqartussat uuliakoortoqannginnissaanut atortussat 20 million koruuninik nalillit tunissutigerusummagit.

Naalakkersuisut kissaatigaat aatsitassarsiorneq Kalaallit Nunaata aningaasaqarneranut, inuussutissarsiornermik ineriartortitsineranut aammalu ineriartoqqinneranut peqataanissaa. Kuupik Kleist naliliivoq uuliasiornermi upalungaarsimasunik pilersitsinikkut avatangiisinut kisimi iluaqqutaanani aammali inuussutissarsiornikkut ilapittuutaassasoq.

Kalaallit Nunaanni inuussutissarsiornermut iluaqqutaanissaata tunngavigaa, suliffeqarfiup nunatsinnit nammineq pigineqartup ukiuni aggersuni annertuumik ineriartorteqqinneqarsinnaanera. Uuliamik gassimilluunniit Nunatsinni nassaartoqassagaluarpat, Nunatsinnut iluaqqutaassaaq suliffeqarfimmik pilersitsereersimaneq, upalungaarsimanermik suliassat amerliartortussaammata.

- Uuliasiornermi upalungaarsimanermik suliassaqarfik Kalaallit Nunaanni suliffissuanngorsinnaavoq amerlasuunik sulisulik, Kuupik Kleist oqarpoq.