Aallaaneqartoq aallarunneqarpoq - arnaq aallaasertoq tigusarineqarpoq
Angut 30'nik ukiulik Nuummi Dronning Ingridip napparsimavissuanut aallarunneqarpoq, Narsami maamigut aallaaneqareerluni
Arnaq 23'nik ukiulik sapaatit akunneri sisamat tigummineqarallassaaq sisamanngornermi Narsami aallaasersortoqarnerata kingorna.
- Arnaq 23'nik ukiulik - imaassinnaavoq - sisamanngornermi ualikkut ernguttoqarnerani angummik 30'nik ukiulimmik aallaannittoorsimasoq, inuit arfinillit inissiami aalakkuterujussuarnerisa nalaanni, Bent Ole Kleist Qaqortup politeeqarfiani pisortaq oqarpoq.
- Nalunaarfigineqarnitta kingunitsiaa inissiamut iseratta arnap inissiaq qimareersimavaa. Paasitinneqarnerput naapertorlugu inuit aalakkussimapput ajortumik pisoqarani. Nuannisarujussuaannarsimapput.
- Piffissalli ilaa arnaq aallaammik tigummialersimavoq sikaavimminngaanniit tigusaminik. Aallaat uppatermioralugu issiatillugu tassanngaannaq aallaariarpoq.
- Suli ilisimanngilarput piaaraluni imaluunniit aallartoornikkut aallaannittoqarnersoq, Bent Ole Kleist Sermitsiaq.AG'mut oqarpoq.
Pilatsinnini anigorluarpaa
Angut 30'nik ukiulik aallaaneqartoq erngerlugu Nuummi Dronning Ingridip napparsimavissualiaanneqarpoq.
Bent Ole Kleist oqaluttuarpoq angutip pilatsinnini anigorluaraa.
Tallimanngornermi ualikkut arnaq Qaqortumi killisiorneqarpoq sapaatip akunneri sisamat tigummineqarallartussanngortinneqarluni. Persuttaasimasutut unnerluunneqassaaq.