BankNordik GM aallartilerpoq
Aqagu ataasinngornermi assammik arsarnermi arnat angutillu pissartanngorniunnerat GM Ilulissani aallartissaaq
Inersimasut assammik arsarlutik pissartanngorniunnerat ataasinngornermi ualikkut nal. 14.00 Ilulissani timersortarfimmi aallartissaaq. Timersoqatigiiffiit arnani tallimat angutinilu arfinillit BankNordik GM peqataaffigissavaat, unammersuarneq sapaatip akunnera naallugu ingerlasussaq KNR-TV'imit ullormut unamminernik pingasunik aallakaatitsiffigineqassalluni.
Angutit unammiartortut tassaapput: K-33, Qaqortoq, NÛK aamma GSS, Nuuk, SAK, Sisimiut, Norsaq HC, Aasiaat, aamma Nagdlúnguak, Ilulissat. Arnani timersoqatigiiffiit peqataatitaqartut tassaapput: NÛK, GSS, SAK, I-69 aamma Nagdlúnguak.
Dommerit Siggartameersut aamma Grønlands Håndbold Forbund isumaqatigiinngissuteqarnerisa kingorna danskit dommerioqatigiittartut pingasut aamma kalaallit dommerioqatigiittartut ataatsit, Ilulissani BankNordik GM'imi siggartuussapput.
GSS, Nuuk arnani angutinilu pissartaanerminnik illersuisussaapput. Ammaanersiorluni unammineq nal. 14.00 aallartissaaq - angutini Nagdlúnguak aamma SAK unammissallutik.