Sisimiut Umiarsualiviat allilertussanngorpoq
Sisimiut Umiarsualiviat suliffeqarfiup Aarsleff/Permagreen allilissavaa. Isumaqatigiissut atsioreerpoq - umiarsualiviup allissutaa ukiup naanerani naammassissangatinneqarpoq
Qeqqata Kommunia suliffeqarfillu Aarsleff/Permagreen Sisimiut Umiarsualiviata allilernissaanik tamakkiisumik suliarissagaa isumaqatigiissummik atsioqatigiipput.
Illuatungeriit naatsorsuutigivaat, umiarsualiviup allilerneqarnissaa qangali utaqqisaasoq, qallersuusernissaa kisiat ilanngunnagu ukiup naaneranut naammassineqassasoq.
Qeqqata Kommuniata borgmesteriata Hermann Berthelsen-ip Aarsleff/Permagreen-ikkunnik suleqateqarnissaq qilanaarivaa.
- Suut tamarmik pilersaarutitut ingerlapput. Umiarsualiviup allilernissaani isumatusaartumik neqeroorutit arlallit tiguavut, massakkullu aningaasatigut isumatusaarfiusumik isumaqatigiissuteqarluta. Pingaartumik sukangasuumik pilersaarusiap tupaallatsippaatigut. Decembariuliinnaraa Sisimiut Umiarsualiviata/Qeqqata Kommuniata kilisaatit, umiarsuit tunitsiviit, umiarsuit takornarissanik angallassisut uuliamillu misissuinermi atorneqartut pitsaasumik atugassaqarfiusumik neqeroorfigisinnaalissavaat.
- Qilanaarivaralu Sisimiut avaqqutiinnarlugit umiarsuit ingerlaartut takussaarnissaat, taakkununnga inuiaqatigiinnullu tamanna akisusaqaaq, Hermann Berthelsen oqarpoq.
Ataatsimoorussamik suliassaat siulleq
Suliffeqarfimmut Aarsleff/Permagreen Sisimiut Umiarsualiviannik allilerinermi suliassaq tassaavoq, aatsaat ataatsimoorlutik taama annertutigisumik suleqatigiiffigisassaat. Tamannalu pisinnaalersimalluni ukiualuit qaangiuttut suleqatigiinnissamik isumaqatigiissuteqaramik.
- Kalaallit Nunaanni illoqarfinni qangali umiarsualiviliortoqarnikuuvoq. Nuannaarutigivarpullu Qeqqata Kommuniata tatigaluta isumaqatigiissusioqatigisinnaammatigut, taama oqarpoq Preben Kold Larsen suliffeqarfik Aarsleff/Permagreen-meersoq, siunissamilu Kalaallit Nunaanni umiarsualiviliortoqaqqinnissaa neriuutigalugu.
Aarsleff Danmark-imi Estland-imilu umiarsualiviliornernik misilittagaqarpoq, taakkulu aamma tamakkiisumik suliakkiussaasarsimallutik.
Permagreen Kalaallit Nunaanni sanaartornermik sanaartukkanillu isumaginninnermik suliqartartut annersarivaat, nunalu tamakkerlugu sanaartukkatigut annertuumik misilittagaqarluni.