Assi una pitsaanerpaat ilagaat
Kalaallit Nunaanni umimmammik tiggammik assilisaq nunat tamalaat assiliisunik unammisitsineranni inissilluartoq
Lars Holst Hansen, biolog aamma pinngortitami assiliisartoq assilisanik tuniniaavimmut arc-pic.com'imut attuumassuteqartoq, poorski sioqqullugu nunat tamalaat akornanni miluumasunit assilisanik unammisitsinermut - Nordic Nature Photo Contest - assilisaa ilanngunneqarpoq.
- Assilisani assigiinngitsuni unammisut ataatsimik ajugaasoqartarput qulingiluallu ingerlaqqissinnaallutik. Uanga assilisara qulingiluat akornanniippoq normukkaartinneqaratilli, Lars Holst Hansen, Sermitsiaq.AG'mut oqaluttuarpoq.
Kalaallit Nunaata Avannaarpiarsuata tunuanit nunami eqqissisimatitami ilisimatusarfimmit Zackenberg Forskningsstation umimmammik tiggammik assilisaa unammisut akornanniippoq. Ilisimatusarfimmi ukiut tamaasa qaammatini sisamani nunap pissusaata allanngoriartorneranik biologisut malinnaalluni sulisarpoq, ilisimatusarneq taanna 1995'imi aallartittoq.
Ungasianit aqunneqarsinnaasoq assiliissut roboti
Lars Holst Hansen maannakkorpiaq Nunatta avannaarpiarsuani Zackenbergimi ukiut arfinilissaat sulinissaminut piareersaleruttortoq, pinngortitami sulileqqinnissani qilanaaraa silaannaallu allanngoriartornerata kinguneri paasisassarsiorfigeqqissallugit. Taassuma aamma neriuutigaa nutaanik amerlasuunik pitsaasunillu assileeqqinnissani, ilaatigut assiliivik ungasianik aqutaq atorlugu - robot - mannakkut sanallugu ingerlatani.
Assilisanik unammisitsinersuarmut peqataasussanngornini Ittoqqortoormiuniitilluni paasivaa, tamaani Lars Holst Hansen, assilisanillu tuniniaaviup arc-pic.com pilersitsisua Carsten Egevang, assilialerisartorlu Ole Steen Pedersen illoqarfimmiut piniartut ilaat piniariartoq peqatigalugu angalaarnerup nalaani.
Uumasunik miluumasunik assilisat pitsaanerpaat qulit uni takusinnaavatit.