Inatsit nutaaq misissugassanngortikkaat

Danmarkimi atuarnermut Kalaallit Nunaannilu sungiusaammik sulinermut malittarisassat erseqqissut

Loven om erhvervsuddannelser er sendt til serviceeftersyn. Foto: Leiff Josefsen

Inuussutissarsiutitigut ilinniartitaaneq pillugu inatsit januaarip aallaqqaataani 2011-mi atuutilerpoq, ilinniartitaanermullu naalakkersuisup Palle Christiansenip, Demokraatit, upernaakkut ataatsimiinnermi inatsisip misissorneqarnissaa kissaatigaa, tamatumalu peqatigissaanik ilinniartitaanermut periusissamik saqqummiussissalluni.

Januaarup aallaqqaataani 2011-mi Kalaallit Nunaanni inuussutissarsiutitigut qitiusumik ilinniarfiit brancheskolenik taaneqartartut pisortani suliffeqarfittut namminersortitaalerput namminerisaminnillu siulersuisoqalerlutik, tamatumanilu "tigooraasussat" - suliaqarfinni pineqartuni suliffeqarfiit sinniisuutitaqarluarlutik. Qitiusumik ilinniarfinni ingerlatat akuleriiaassinnaapput, taamaattumillu inatsimmi immikkoortoq ilinniarfiit naatsorsuutaannut tunngasoq sukaterneqassalluni. Januaarip aallaqqaataani 2013-imiit ukiumoortumik ingerlatsinermut naatsorsuutit aningaasanut inatsit aqqutigalugu aningaasaliissutinut immikkut naatsorsuutinik ingerlatanullu allanut immikkut naatsorsuutinik imaqartitaasalissapput.

Inuussutissarsiutitigut ilinniarfiit tamarmiusut ingerlanneqarnissaannut 210 millioner koruunit 2012-imi aningaasanut inatsimmi immikkoortinneqarput.

Inuussutissarsiutitigut ilinniagaq ilinniagaavoq atuagarsornerup sulinerullu paarlakaajaallugit ingerlanneqarfigisaat, ilinniagarlu nalinginnaasumik ukiunik marlunniit tallimanut sisivussuseqarajuttarluni. Inuussutissarsiutitigut ilinniakkamik aallartitsisinnaassagaanni qitiusumik ilinniarfimmi tigutissimasariaqarpoq sungiusaammillu suliffissamik nassaarsimasariaqarluni.

Malittarisassat erseqqissut
Inuussutissarsiutitigut ilinniartitaanerit ingerlanneqartarput Qaqortumi Nuummilu niuernermik ilinniarfinni, Narsami inuussutisslerinermik ilinniarfimmi Inuilimi, Paamiuni Imarsiornermik Ilinniarfimmi, Nuummi Peqqissaanermik Ilinniarfimmi, Nuummi Saviminilerinermik Ilinniarfimmi, Sisimiuni Sanaartornermik Ilinniarfimmi, Sisimiuni Aatsitassalerinermik Ilinniarfimmi, Sisimiuni Ilusilersuinermik ilinniarfimmi, Ilulissat Perorsaanermik Ilinniarfimmi, kiisalu Uummannami Aalisarnermut Piniarnermullu ilinniarfimmi.

Inuussutissarsiutitigut ilinniartitaanerit ilaat Kalaallit Nunaanniinnaq ingerlanneqartarput, ilinniartitaanernili allani atuarfimmiinnerit ilaat tamarmilluunniit Danmarkimi pisarlutik.

Palle Christiansenip allannguutissatut siunnersuutaa Kalaallit Nunaanni sungiusaammik suliffissat, Danmarkimi inuussutissarsiutitigut ilinniartitaanermut attuumassutillit - tassa ilinniakkat Danmarkimi ilinniarfinnit neqeroorutigineqarfigisaat sungiusaammilli sulinerup Kalaallit Nunaanni ingerlanneqarfigisaat, akuersissutigineqartarnerinut malittarisassanik erseqqissunik pilersitsissaaq.

Powered by Labrador CMS