Kukkunikkut akiligassiissutit naalagaaffiup karsianut tutsinneqartut

Kalaallit Nunaanni inatsisini inatsisit kalaallisoortaat atuuttuupput

Avatangiisinut inatsimmik unioqqutitsinernut akiligassiissutit nunatta karsianut tuttalissapput. Ass.:/Foto: Polfoto

Namminersorlutik Oqartussat inatsisaat, nalunaarutaat peqqussutaallu kalaallisut qallunaatullu allanneqartarput, oqaatsinili taakkunani marlunni aaqqiagiinngineqartillugu inatsisit kalaallisoortaat atuuttarput.

Taamaattumik nunamut namminermut, pinngortitamut avatangiisinullu nalakkersuisoq Anthon Frederiksen, Kattusseqatigiit Partiiat, upernaakkut ataatsimiinnerup ulluani siullermi tallimanngornermi apriilip 13-iani oqaluuserisassat siulliit ilaattut avatangiisit illersorneqarnissaannik inatsimmut qaammatinik sisamaat affaannarmik pisoqaassusilimmut allannguutissamik saqqummiussissaaq.

Avatangiisinut inatsisip ukiortaamiit atuutilersup allanngortikkasuarneqarneranut oqaatsitigut assigiinngissut pissutaavoq. Qallunaatuuani allassimavoq »akiligassiissutit ... nunatta karsianut tutsinneqartassapput«. Kalaallisuuani aalajangersagaq taanna pissutaa nalunartumik puigorneqarsimavoq. Pineqartoq tassarpiaavoq § 68, imm. 2.

Tamannalu ajorpoq. Inatsisip kalaallisoortaa nalornisoortoqartillugu atortussaasartoq, akiligassiissutit nunatta karsianut tutsinneqartussaanerannik aalajangersakkamik erseqqissumik imaqanngippat - aap, taava naalagaaffiup karsianut nakkartinneqassapput.

Nunatta karsianut
– Inatsimmi aalajangersakkat qallunaatut kalaallisullu assigiilernissaat allannguutissatut siunnersuummit qularnaarneqassaaq, avatangisiinut tunngasuni akiligassiissutit siunissami nunatta karsianut nakkartinneqartalersinnaaqqullugit, Anthon Frederiksen nassuiaavoq.

Kalaallisut allassimasuni allannguut, avatangiisit illersorneqarnissaannik inatsisip unioqqutinneqarneranut atatillugu akiligassiissutit nunatta karsianut nakkartinneqartalernissaannik qularnaarisoq, juunip aallaqqaataani atuutilissaaq. Maannamuugallartoq avatangiisinut inatsimmik unioqqutitsinerit pillugit akiligassiisoqarsimanngilaq, taamaattumillu inatsisit kalaallisut qallunaatullu oqaasertaasa imminnut naapertuutinnginnerisa kingunerannik nunatta karsia annaasaqarsimanani.

Oqaatsit taakku marluk akornanni nutserinermi suugaluartumiluunniit paatsoornernik kukkunernillu pisoqarsinnaasarpoq, inatsisillu qaammatinik 3,5-nik pisoqaassusillip allanngortikkasuarneqarneratigut Namminersornerullutik Oqartussani inatsisilerituut qallunaat inatsimmik qallunaatut allattuusartut, nutserisullu kalaallit, inatsimmik kalaallisut atuuttussamik nutserisartut, akornanni kukkusoqarsimanera takutinneqarpoq.

Powered by Labrador CMS