Eqeersaatitallit meeqqanut inerteqqutaalissapput
Inatsisartut upernaakkut ataatsimiinnerisa ammarneqarnerani IA-kkut Demokraatillu isumaqatigiinnginnerat nittarsaanneqarpoq
Imertakkat nuannarineqaqisut koffeineqarluartullu eqeersaatitallit soorlu Red Bull, Cult aamma Burn meeqqanut 18-it inorlugit ukiulinnut inerteqqutaalissapput.
Inatsisartut upernaakkut ataatsimiinneranni ullormi siullermi peqqissutsimut naalakkersuisoq Agathe Fontain Inuit Ataqatigiinneersoq inatsisissatut siunnersuummik saqqummiussissaaq, tassani imertakkanik eqeersaatitalinnik meeqqanut 18-it inorlugit tuniniaaneq sassaalliinerlu inerteqqutaalissalluni. Aamma imertakkat eqeersaatitallit ussassaarutiginissaat inerteqqutaalissaaq, imertakkallu eqeersaatitallit inunnut 18-it sinnerlugit ukioqartunut ersarissumik allagartalerneqassapput koffeinimik imaqarnerujussuat mianersoqqussutigineqarluni.
Qillertuusaq 0,25 literi imertakkamik eqeersaatitalimmik imaqartoq 80 milligrammit missaanni koffeinimik akoqarpoq. Assigaa kaffi tiitorfimmut. Kaffisullammaat nalunngilaat kaffisoraanni sivikitsumik nukissaqarnerusutut misigisarneq, annertuallaamilli koffeinitornermi naalarululerluni kamaqqajaalluni iluamillu sulisinnaani. Akerlianik nukissakinnertoqarluni kaffisornerujartortilluni eqeersaatitalinnillu imernerukartortilluni. energidrik indeholde omkring 80 milligram koffein.
Nuna inerteqquteqarfik
Tamakku tamarmik meeqqanut inuusuttunullu 18-it inorlugit ukiulinnut inerteqquteqarnermi tunngasissaapput pitsaasut, kisianni inatsisissatut siunnersuut partiit naalakkersuisooqatigiit Inuit Ataqatigiit allatut periuseqarnissamik inatsisiliorniartut Demoraatillu inuit namminneq aalajangiisinnaassusaannik illersuisut isumaqatigiinnginnerujussuarmik nittarsaasuuvoq.
Siumumiit Inatsisartunut ilaasortaq Malik Berthelsen 2011-mi upernaakkut ataatsimiinnermi siunnersuuteqarpoq imertakkat eqeersaatitallit meeqqanut 12 inorlugit ukiulinnut inerteqqutaalissasut. Demokraatit siunnersuut akerleraat, Inuilli AtaqatigiitSiumut peqatigalugu tupaallaataasumik sukaterinissaq isumaqatigaat taamaalilluni inatsisissatut siunnersuummi 18-inik ukioqalersimanissamik qaffaasoqarluni.
Upernaakkut ataatsimiinnissaq sioqqullugu Demokraatini naalakkersuinikkut oqaaseqartartoq Anda Uldum mianersoqqusivoq: Aasianni kollegianiikkaanni ineeqqami imigassartorneq inerteqqutaavoq. Tunumi najugaqaraanni imigassamik kimittuumik pisisoqarsinnaanngilaq. Inuiaqatigiinni sakkortuumik innersuussutigineqarpoq imertakkat eqqersstitallit inerteqqutaalernissaat. Ilumut, suut tamarmik inerteqqutaanerat unitsittariaqarparput. Demokraatit nuna inerteqquteqarfiusoq naagaarpaat.
Kisianni Inuit Ataqatigiit Siumullu naalakkersuisooqatigiit avataanni inatsisartuni amerlanerussuteqarluarput ilaasortaasunit 31-iusunit 24-ugamik. Inatsisissatut siunnersuut aappassaaneerneqarlunilu pingajussaaneerneqassaat ukiakkut ataatsimiinnermi, taamaalilluni aasaanerani inatsisissatut siunnersuut tulluarsarneqarsinnaalluni.