Aatsitassanut aningaasaateqarfik imaqanngitsoq avissaartuuffigaat
Demokraatit ernumassutigaat aatsitassatigut isertitat ullumikkut atorneqarnissaat kinguaariilli tullissaannut ileqqaarneqaratik
Uulia kuseriarniinguarluunniit suli maqinneqanngitsoq partiit naalakkersuisooqatigiit Inuit Ataqatigiit Demokraatillu nunatsinni aatsitassanut aningaasaateqarfik immerneqaraluttuartoq annertuumik aaqqiagiinngissutigaat.
Inuutissarsiornermut aatsitassanullu naalakkersuisoq Ove Karl Berthelsen Inuit Ataqatigiinneersoq uparnaakkut ataatsimiinnerup ulluani siullermi aatsitassat pillugit inatsimmut allannguutissatut siunnersuut saqqummiussissaaq, tamannali Demokraatini naalakkersuinikkut oqaaseqartartup Anda Uldumip akerleralugu oqaatigereerpaa.
Aatsitassanut aningaasaateqarfik pillugu inatsit 2008-mi ukiakkut ataatsimiinnermi akuersissutigineqartoq atuutilissaaq nunatta karsianut aatsitassatigut minnerpaamik 5 million koruunit ukiumi naatsorsuusiorfiusumi ataatsimi nakkarpata. Sulili taama pisoqarsimanngilaq.
Ove Karl Berthelsenteqassaaq taamaalilluni nunatsinni aatsitassanut aningaasaateqarfik aatsaat atuutilerluni ukiumi naatsorsuusiorfimmi ataatsimi minnerpaamik 75 million koruuninik aatsitassatigut isertitaqartoqarpat.
– Naalakkersuisut nalilerpaat 5 million koruunit aningaasaateqarfimmut ikineqarunik ima erniakitsigissasut siulersuisunut, aqutsisunut allaffissornermullu aningaasartuutinut matussutaanissaminnut naammannatik.
Hollandimi nappaat
Maannakkut inatsisip kinguneraa naalakersuisut ukiumi ataatsimi aatsitassatigut isertitat 5 miilion siulliit atorneqarsinnaallutik, inatsilli allanngorpat ukiumi ataatsimi aatsitassatigut isertitat siulliit 75 million koruunit atorneqarsinnaallutik sinneri aatsitassanut aningaasaateqarfimmut ikineqartinnavit.
Demokraatiniit Anda Uldum mianersoqqusivoq: – Inatsisip allanngortinnerata kingunerissavaa namminersorlutik oqartussat ingerlatsinermut aningaasartuutati ukiumut 70 million koruunit tungaanut annertusisinnaallutik aatsitassatigut iseritat (neriunaqisumik) amerliartortillugit.
– Tamanna nunatsinni aatsitassanut aningaasaateqarfik pillugu siunertanut akerliulluinnarpoq. Aningaasaateqarfik pilersinneqarpoq Hollandimi nappaammik taaneqartartoq pinaveersaarmniarlugu, tassani aatsitassatigut isertitat uungaannaq isigaluni atorneqarneranni Hollandi aningaasatigut atugarliulerni aatsitassatigut isertitat piffissami sivikitsimi isertinneqartut isaajunnaarmata, Anda Uldum oqarpoq.