Nuummeersut annilaarujussuaannartut
Ilaatigut Thailand tassaarsuaqarsinnaaneranik aarlerisaarimmat Nuuni Heilmann aamma Karsten Pedersen pisunut qanittuararsuarmiipput
Katernaatut angalaneq Nuuni Heilmannimut Karsten Pedersenimullu piffissami matumani Thailandimi angalasunut ajorluinnartumik kinguneqarsimasinnaagaluarpoq.
Indialli imavittaani Det Indiske Oceanimi nunap sajorujussuarnerata malitsigisaanik aseruisunik tassaarsuaqarsinnaaneranik aarlerinartorsiorneq qaangiussimagunarpoq. USA-mi tassaarsuaqarsinnaaneranik kalerriisarfik kiisalu Sri Lanka, India Indonesialu nunatsinni nalunaaqutaq ullup-qeqqaraa tassaarsuaqarsinnaaneranik aarlerisaarutiminnik atorunnaarsitsipput.
- Maani Phuketimi ualigaa scooterinut attartukkanut ilaalluta ingerlaaruttorluta inuppassuit sissap tungaanit arpaliullutillu pisuinnartut takulerpavut. Ilaat qissapput. Susoqarnersoq paasiniarlugu unippugut paasitinneqarlutalu Indonesiami nunap sajunnerata kingorna malik 5 meterinik portussusilik tungitsinnut ingerlaartoq, Nuuni Heilmann oqarasuaatikkut ersernerluttukkut Phuketimit Sermitsiaq.AG-mut oqaluttuarpoq.
Læs "Varslingscenter afblæser tsunamialarm"
Læs "Dansk familie søger tsunamily på bakketop"
- Eqqarsaqqaarpugut malik 5 meterinik portussusilik ingasagisassaanngitsoq, kisianni tusagarput soorunami allatuulli pimoorupparput.
- Sissami imaanut qanittumi unnuisoqaqqusaanngilaq, uagullu allallu tassaarsuaq eqqarsaatigalugu isumannaatsumut Phuketip illoqarfiliaanneqarluta.
- Ippassaq Phuketimut tikippugut sapaatip-akunnerinilu tulliuttuni pingasuni katernaatut Thailandimi angalaqqilinnginnitsinni marloriarlutalunnuinissarput pilersaarutigalugu.
34-nik ukiulik Nuuni Heilmann aamma 39-nik ukiulik Karsten Pedersen ulluinnarni Nuummi najugaqarput. Sapaatip-akunnerata ataatsip matuma siorna Thailandimut tikipput.
Asiap kangiata kujasissuata ilarujussuani tassaarsuaqarnissaanik aarlerisaarnermit angalanertik sunnerneqassasoq naatsorsuutiginngilaat.