CL-finale KNR-kut aallakaatinneqassanngilaq
Ajoq! Ukioq manna klubbit unamminerannut pingaarnerpaamut isiginnaartartunut aningaasaliisoqarusunnerluni? KNR-p Messi, Ronaldo finalertussallu allat akissaqartinngilai
Maajip 19-ianni Champions Leaguemi Münchenimi finalernissami ilimagineqarnerpaat finalissagunarput. TV-kulli siginnaartartut Messi ilaalu tv-kut isiginnaarsinnaagunanngilaat.
Unamminerup takutinnissaanut pisinnaatitaaffiup pisiarinissaanut KNR akissaqanngilaq.
- Isiginnaartartuvut taassuminnga misigisaqartikkusuttorujussuugaluarpavut. Pisinnaatitaaffiilli akisoorujussuupput uagullu akissaqanngilagut, KNR-mi pisortap tullia aallakaatitanullu pisortaq Jan Berg oqarpoq.
Nunarsuarmi arsaannerit pikkunarnersaannut pisinnaatitaaffiit Viasat-ip pigai. Tassanilu tunioqqaaginnartoqarneq ajorpoq.
Siusinnerusukkut CL-mi naggataajusumik unamminerit KNR-p aningaasaliisoqarluni takutittarsimavai. Siorna Manchester Unitedip FC Barcelonallu finalernerisa takutinneqarnera Pisiffiup, Grønlandsbankip, Tele Postip aamma Bergansip aningaasaliiffigisimavaat. Aningaasatigut ikiorsiineq nunatsinni arsaannermik nuanarisalinnik nuannaartitsisorujussuaq.
- Maannakkutut isikkoqartillugu ukioq manna taamatut periarfissaqarunanngilagut. Ajoraluartumik, Jan Berg oqarpoq.
Tassa neriuutissaannanngorpoq - piffissaq kingulleq atorlugu - aningaasaleerusuttoqalernissaa.