S: Ove Rosing Olsen, ajorpoq!

Siumumiit Karl Lyberthip Maniitsumi ernisarfiup matuneqarniarnera nakorsaanerullu nassuiaataa nakerinngilaa

Qeqqata Kommuniani borgmesterip tullia siulleq Karl Lyberth Siumumeersoq. Foto: Leiff Josefsen

Qeqqata Kommuniani viceborgmesteri siulleq Karl Lyberth Siumumeersoq Maniitsumi ernisarfiup matuniarneranut atatillugu isornartorsiueqqippoq.

Tamanna pivoq Qeqqata Peqqinnissaqarfiani nakorsaaneq Ove Rosing Olsen nassuiaareersorlu Maniitsumi ernisarfiup matuniarnerani peqqutaasoq ernisussat isumannaatsuunissaaq - sipaarniarnerunngitsorlu.

- Nakorsaanerup Maniitsumi ernisarfiup matunissaanut patsisilersuutitut saqqummiussaa soorunami assortoruminaappoq. Kiammi assortorsinnaammagu isumannaannerpaamik ernisitsisoqartarnissaa patsisilersuutaappat? Karl Lyberth aperaaq.

Læs "Læge: Derfor lukker fødestuen"

Læs "A: Naalakkersuisut skal stoppe fødestue-lukning"

- Taamaakkaluartoq paaserusunnarpoq matusinerup kingunerisinnaasai tamarmik minitaqarnanilu nalilersorluarneqarsimanersut, qulaajagassat assigiinngitsut peqqissaarullugit misissorluarneqaqqaarsimanersut, aalajangiinnginnermi Maniitsumi napparsimmavimmi sulisut isumasiorneqarsimagunik pissusissamisoornerusimannginnersoq, Maniitsumi innuuttaasut isumasiorneqaqqaartariaqarsimannginnerlutik?

Karl Lyberth:Ajorpoq
- Hr. Ove Rosing Olsen,inussiarnersumik qinnuigissavakkit aalajangiinerit peqqissaarullugu nalilersoqqissagit, aalajangeeqqitsinnallu nalilersugassat tamaasa nalilersorluaqqaassagitit, minnerunngitsumillu Maniitsumi napparsimmavimmi suleqatitit isumasioqqaassagitit.

Læs "Siumut kræver forklaring på fødestuelukning"

- Ajorluinnassaarmi kisimiillutit aalajangiinerpit kingunerisaanik Maniitsumi napparsimmaveqarfimmi suliniuterpassuit assigiinngitsut kusanartut nersortariallillu, soorlu imminortarnerit ikilisarniarlugit suliniarnerit, kissaatiginngisamik naartulertarnerit annikillisarlugit suliniarnerit, kinguaassiutitigut nappaatit annikillisarlugit suliniarnerit, naartusunut siusinaartumik paasisitsiniaanerit, allallu suliniutit innuttaasunut iluaqutaalluartut sapanginneqanngikkunik annikillilerneqarpata, Karl Lyberth erseqqissaavoq.

- Hr. Ove Rosing Olsen, ajorpoq!

Powered by Labrador CMS