Royal Greenlandip tunitsivik tunivaa
Royal Greenlandip Arsummi tunitsivia Arsuk Food ApS-imut Arsummiuunerusunit pigineqartumut tunineqarpoq
Arsuk Food ApS-ip Arsummi Royal Greenlandip tunitsivia pisiaraa.
Tunitsivik tunineqaraluartoq Royal Greenlandi tunitsivimmut attuumassuteqaannassaaq, tassami tunisinermi ilanngullugu isumaqatigiissutigineqarpoq, nipisanit tulaassat tamarmik taamalu nipisat suaat Royal Greenlandimit pisiarineqartassasut.
Arsummi tunitsivik 5 tonsinik ulloq unnuarlu tunisassiorsinnaavoq 80 tonsinillu qerisuuteqarsinnaalluni. Ulapaarfiunnginnerani ataatsimik sulisoqartarpoq ulapaarfimmilu arfinilinnik sulisoqarsinnaasarluni.
Umimmaap neqaanik tunisisoqartassaaq
AArsuk Food ApS Arsummiunit Halibut Greenlandimilu pisortaasimasumit pilersitsisimasumillu Daniel Skiftemit pigineqarpoq, piginneqataasut katillutik 46-ullutik.
- Neriuutigilluinnarparput isumalluarfigalugulu Royal Greenlandilu siunissami suleqatigiilluarumaartugut, pisortaq Daniel Skifte oqarpoq.
Piginneqataasut tunitsiviat piffissami matumani nipisat suaannik tunitsiviuvoq. Piginnittut neriuutigaattaaq qaleralinnik saarullinnillu ukioq manna aamma tulaassuisitsisinnaassallutik.
- Piginneqataasuttaaq pilersaarutigaat siunissami umimmaat neqaannik tunitsivigineqarsinnaassallutik, Daniel Skifte ilisimatitsivoq.