Ernisarfiup matunera nassuiaqquaa

Qeqqata Kommuniani viceborgmesterip siulliup Karl Lyberthip Maniitsumi ernisarfiup maajip aallaqqaataani matunissaa kipiluttunarnerarpaa

Qeqqata Kommuniani viceborgmesteri siulleq Karl Lyberth. Foto: Siumut

- Hr. Ove Rosing Olsen nassuiaateqartariaqarpoq.

Taama nunap immikkoortuani nakorsaanermut Ove Rosing Olsenimut piumasaqarpoq Siumut sinnerlugu Qeqqata Kommuniani viceborgmesteri siulleq Karl Lyberth.

Taama oqarpoq Maniitsumi ernisarfiup maajip aallaqqaataani matunissaa nalunaarutigineqareersorlu, taamaalillutik Maniitsumi naartusut Sisimiunut erniartortariaqartalissallutik.

- Maniitsormiuulluni tupannarpoq akuerineqarsinnaanngilluinnarlunilu paasillugu illoqarfitsinni ernisarfiup ingerlalluartup matuniarneqarnera, Karl Lyberth oqarpoq

- Maniitsormiuusugut paasitinneqartariaqarpugut suna imaluunniit suut pissutigalugit ernisarfik ingerlalluartoq matuniarneqarnersoq, aammalu kina imaluunniit kikkut taamatut aalajangiisimanersut.

- Paasisakka malillugit ernisarfik Maniitsumiittoq assut ingerlalluartuuvoq, aammalu maannakkut ernisussiortoq suliunnaarpat kingoraartissaanik allamik pissarsiortoqarsimananiluunniit. Sooq?

Matusinerup kingunerisassai
Karl Lyberthip oqaatigaa Maniitsup peqqissaasoqarfiani 'annilaangatigineqartoq' sulisut ikilisarneqassaluarpata suliniuterpassuarnut allanut kusanartunut, ingerlalluartunullu ajortumik kinguneqarsinnaasoq.

- Imminortarnerit ikilisarniarlugit suliniarnerit, kissaatiginngisamik naartulertarnerit annikillisarlugit suliniarnerit, kinguaassiutitigut nappaatit annikillisarlugit suliniarnerit, naartusunut siusinaartumik paasisitsiniaanerit, allallu suliniutit innuttaasunut iluaqutaalluartut ajoraluartumik sapanginneqarlutillu annikillisinneqassapput taamatut pilersaaruteqarneq piviusunngussappat.

- Hr. Ove Rosing Olsen, Peqqinnissarfinni Maniitsumi Sisimiunilu akisussaasutut erseqqissumik Maniitsormiuusugut nassuiaattariaqarpatsigut suna pissutigerpiarlugu Maniitsormiunut akornutaalluinnartussamik taamatut aalajangiisoqarsimanersoq, aamma kina/kikkut taamatut aalajangiisimanersut!

Powered by Labrador CMS